Corpo Pagina

Il fiume e l’uomo

Rio Mogoro

Abi ddui est s’aqua dui est sa fida. E su frummini de Moguru, cun is arrius e is coras de accanta est istau sempri de aggiudu donendi nodriziu a is popolaus, animalis e arresis chi ddui hant biviu accanta in su tempus.

Cun is frumminadas suas nd’hat fattu arrumbulai a is pranuras sa pedra de pistoni (S’oru nieddu de s’antighoriu) usada e traballada po fai is ainas po is domus, po sa cassa, e sa pisca. Nd’hadi scabiossau a basciu sa pedra bianca e niedda, sa giarra e s’anei grussa e fini, chi s’omini sindi est serbiu po impedrai is bias, gutturinus, prazzas e cotillas. Hat donau forza a is mulinus chi s’omini masciendi e aderezzendi sa currenti hat usau po mobi su trigu po su nodriziu e abbisongiu de is popolaus chi ddui bivint accanta.

Su mattedu chi ddui crescidi e madrigat accanta e addei de is atzas e mraxis de su frummini cumenti a: su linnarbu, pubuia, s’axibi e s’ollastu de frummini, chi funt istaus usaus e traballaus de sempri in medas genias po fai scannus, cadiras, mesas, piatteras, scabas, intabaus, traias e traicciobas po is domus e atra mobilia, po fabbricai scabas de carru, carrettas, carrettonis e carrossinus.

In su frummini de Moguru, impari a sa spadua, su cannisoni e su tramatzu, ddui fait sa canna, chi sa genti po is callidadis de aguantamentu chi tenit, hant sempri decrarau cumenti a sa prus inzettada po fabbricai cannizzadas, cadinus e scateddas, bovidas po is domus e is cresias. E beniant puru a dda scioberai is sonadoris po fai is cuncodrias de is sonus de canna, cumenti a launeddas, benas, suittus e pippiolus, po is sonus praxibie e armoniosus chi custa genia de canna a (nu longu) arrennesciada a donai.

Ma in custu frummini, chi fut “Sacru” po is Punicus e Romanus, sa cosa chi prus est abarrada in s’arregodu de sa genti, est s’abbudanzia de s’anguidda (fillatrotta), chi cun is primas frumminadas de s’attongiu si podiant piscai finzas allonada (in letargo), tant’e berus ca funt presentis ancora oindì una cinquantina de nassas fattas de pedra abi sa tastera masciat e accorrat s’aqua in sa ucca de sa nassa abi ddui est su paradroxu cun d’unu fibau fotti e intippiu, pruscatottu in su cugulloni, chi imprasonada ancora su piscau chi serbit po nodriziu po il popolaus chi bivint accanta de su frummini.

In su passau, e in parti finzas a oindì si piscàda ixibedda, cambaredda, coccioba e cozzas bambas chi si agatàda cumpudendi me is aquas bascias addei de is carroppus e me is baus ingiarraus e arenosus. In su frummini ddui bivint puru su bicca matta (picca picca), su caboischeddu, sa puddixedda e su caboni de aqua. No mancanta mancu is anadis cumenti a su concu idri e me is istasonis de is tramudamentus is bobidus de caccabeddas e zaccarreddas, chi imparia su zurrufigu, sa meurra biccu xera, su passirillanti, sa meurra de aqua, sa madixedda groga e atrus pilloneddus cumenti a su topi de is cannisonis donant cuncodria a su frummini cun is coloris is cantus e is ischibius insoru.

Dui bivinti ancora is tostoinus de siccu e di aqua, sa pibara arraspiosa de aqua, e pruscatottu sa trinca e sa grappa chi s’omini sighit a piscai impari cun s’anguidda, a gamus, gudroni, a fracca, cogollus, pisceddas, a bruzzadura e finzas avvellenendi is carroppus e is andarius cun sa lua, su truiscu, sa scruidda e finzas cun su zruffuru.

Ma s’omini, de su frummini, s’ind’est sempri serbiu, aquendi is terras e matas de accanta, cumenti a s’arenada, sa meba pirongia, meba pera, pira, nespula, figu de ognia callidadi, ceresia piricoccu, pruna e atru mattedu chi is ominis ancora oindì sighint a prantai me is giardinus nodius chi ddui fruttuant accanta.

Est istau puru logu de spassiu, de friscura in sa cama de s’istadi, abi pruscatottu sa picciocalla (mancai prazzattaus de mammais e babbais) imparanta a annadai, a sa callalledda, a brazzadas e zurrufigai de is mraxis, cun sa spera de du podi fai una dì, in su mari sempri disigiau.