Corpo Pagina

Flora e vegetazione

A su sartu de Mòguru si podit circai de donai ordini in custas genias:

  • Zonas aundi crescint prus che totu is matas annualis no arestis ma coltivadas;
  • Zonas postas a bìngias, olias,mèndulas e ortus de aràngius e àteru;
  • Zonas de rimboschimentu cun matas istràngias comenti a s’opinu e s’ocalitu.

Custas zonas postas totus impari faint is logus antròpicus, poita su traballu de s’òmini at mudau is sartus aundi cresciat su materi naturali.

Sighint àterus logus e sartus prus naturalis comenti a:

  • Zonas de arrocas e crontas ispolladas de materi;
  • Zonas de erbas po pasturas cun intramesu unu pagu de materi;
  • Zonas de istruvialla cun materi bàsciu e mobixeddas de moddizzi,arrideli,ciorixina, ollasteddus, murta e matixeddas basciotas;
  • Zonas de padenti cun matas mannas.

Is padentis de is ìxili (Quercus ilex) funt pagus e s’agatant prus che totu in is atzas, is màrginis e is costeras de is pranus de pedra niedda chi si agatant in su territòriu. Medas bortas custus padentis funt trobilicaus de mobas, crachiris e istupìngius intramassaus cun s’arruu chi no lassant passai ne òminis be arresis e aundi agatant su logu giustu po crèsciri sa lana de pedra, fìxili, cerèsia dama, tintioni e asuta finzas medas arratzas de cordolinu.

A custu materi s’aciungit puru: s’ollastu, su linnarbu, s’ùlumu, ollastu de arriu, su frassu, su suèrgiu, orroli.

Aundi su padenti est prus arrau, poita s’òmini at fatu narboni po is pasturas o po is fogus chi ant abruxiau su logu, funt presentis is mobas comenti a:

  • Mobas de modditzi e ollastu;
  • Murta;
  • Murdegheddus o murdegoni in logus passaus de su fogu o a degradu;
  • Tùvara e Ollioni ;
  • Mobas de lua de monti;
  • Mobas de sibiqua e atras.

Sinniali de degradu de su materi, su murdegu s’agatat prus che totu in logus de arroca meda, sena matas e cun mobixeddas piticas e bàscias.

S’agatant meda sa tiria, s’erba de Santa Maria, s’erba gatu, ispicu, erba de is janas.

Is erbas sena mobas linnosas acuntessint prus che totu is sartus po pàsciri, su parsu, is istepas, sa pseudoistepa.

Me is coras e is arrius prus che totu in bàsciu de is canalis e me is atzas e màrginis de su frùmini de Mòguru ddoi crescint meda matas de linnarbu, pubuìa, axili, ollastu de frùmini, tramatus,cannas e cannisonis,ispàdua mascu e fèmina, giuncu, zoia e sessinàrgius.

Chistioni a parti est cussa chi acuntessit is padentis artifitzialis fatus de s’òmini, chi at postu genias de matas chi non funt de innoi, prus che totu conìferas e ocalitu, chi mudant s’ambienti naturali. Ma in cuscus ùrtimus annus funt ponendi conìferas impari a is genias de matas de is logus nostus.