Corpo Pagina

La chiesa della Madonna di Carcaxia

Sa cresiedda de sa Madonna de Carcàxia (X-XII sec.) s’agatàt in su
sartu de Mòguru. Fadiat parti de una bidda medioevali chi, segundis
su Ditzionàriu Istòricu Sardu de Francesco Cesare Casula, si naràt
Cargi, Calcàrgia o Cracàxia. Fiat, impari a Bonòrcili, in sa Curadoria
antiga de Montis, in su Rennu Giudicali de Arbaree e, una borta
acabau po sa gherra s’istadu giudicali in su 1410, Cargi fiat istètia
una bidda de su Rennu de Sardìnnia, posta impari a sa Corona de
Aragona. In su territòriu cosa sua si funt agataus arrastus de
s’edadi pùnica e romana e fiat istada isciusciada de is Morus intra
de is sèculus XIV e XV e is chi si fiant salvaus, si fiant fuius in sa
bidda de Mòguru.
Segundis su crei de su pòpulu su fueddu Cràcaxia ndi benit de su
pònniri impari is duus fueddus: craca (schiaccia) e àxina (uva), ma
custa etimologia non agatat fundamentu iscientìficu perunu.
Su Paulis in su suu “I nomi di luogo della Sardegna” ndi giait una
etimologia diferenti: Forraxi po carcina.
Sa cresiedda antiga est dedicada, segundis sa traditzioni, a sa
Vèrgini Assunta in Celu e, a testimoniàntzia de custu, est abarrau a
is moguresus su de acostumai a calai de sa bidda po andai, su Vèspuru
de s’Assunta, in is sartus de sa cresiedda a nci passai sa noti
intra de cantus, baddus cenas e tracas cuncordadas, aprontadas po
sa celebratzioni de su mengianu.
Sa crèsia est istada isciusciada in parti in su 1750 e torrada a pesai
in su 1921, gràtzias a una circa de dinai chi iant acuntèssiu totu is
moguresus.