Corpo Pagina

Dal medioevo al Regno d’Italia

In su Medioevu Mòguru fadiat parti de su Giudicau de Arbaree, in sa Curadoria de Parte Montis e est istada capitali puru. In su 1335, a pustis sa paxi intra de s’Aragona e s’Arbaree iat mandau is pròpius delegaus a su primu parlamentu (is Coortis) chi si fut tentu a Casteddu po volontadi de Pedru IV de Aragona. In su matessi annu, Mòguru fut istau donau in fèudu de su rei aragonesu a Franciscu de San Clemente. Fut passau a Giordano Tola in su 1421 e fut istau bendidu a su mercanti sassaresu Giacomo Manca, ma fut passau a Galzerado Torella e a is fradis suus in su 1464.

In sa primu metadi de su Cincuxentus apustis de is assatillus e bardanas fatus de sighida de is morus, sa bidda de Bonòrcili fut istada distruida e giai totus is iscampaus si fiant fuius e fiant abarraus a Mòguru.

In epoca spanniola (1522) Mòguru fut passau de Anna Serra Bernat a Gerolamo Sanjust e apustis fut intrau in propriedadi de is contis de Chirra (1603).

Apustis de sa arrovina de su Marchesau de Aristanis, Mòguru iat sighiu is sortis de sa contea e de su marchesau de Chirra, asuta de is Carroz fintzas a is Centelles e a is Osorio della Cueva.

A s’inghitzu de su sèculu XVI, Mòguru iat acatau sa genti chi si fut fuida de Bonòrcili, sa bidda medievali chi s’agatàt in su pranu de su Campidanu, aundi ddoi funt is bìngias de Is Arenas, distruidu de una bardana de is morus chi iant atacau puru is biddas de Terraba, Uras e Arcidanu, inguni acanta.

Fut istau riscattau in su 1839, in su trasiu de su regnu de Carlu Albertu, secundu is ordinanzas de sa Carta reali promulgada in su 1835, chi punnat a torrai a beni in possessu de is terras sen’e scotturai trascuradas de is feudatarius e fut intrada a fai parti in su regnu d’Italia a pustis s’unificazioni chi si fut fata in su 1861.