Corpo Pagina

Il costume tipico

Costumus mogoresus

In sa bidda de Mòguru, ma ballit puru po giai totu is biddas de sa Sardigna, su costumu de is mascus at apoderau s’usantzia e costumàntzia de su passau. Cussu de is fèminas invècias at tentu mudamentus mannus in su tempus po sa psicologia feminina.

Su cumèrciu chi fadiant is istràngius chi bendiant arroba me is mercaus e me is festas de is diversas stofas e mercantzias e me is ùrtimus tempus is negòtzius e butegas ant donau forma e tràgiu a is costumus de is fèminas sardas atraidas de sa richesa e bellesa de is pannamentas a sa moda chi dda usanta po donai spompiu a sa figura insoru pighendi modellus de is custumus spanniolus, pisanus e genovesus e apustis cun sa benida de is Savoias de is costumus piemontesus.

Is costumus antigus de Mòguru insaras no funt atru che un’amasturu fantasiosu nòdiu de mollus e pannamentas chi podeus circai de elencai in custas genias.

Su costumu de is mascus

Benit de s’antigoriu e est documentau puru de is brontzetus nuraghinus de bruntzu, chi amostant su modellu de bistimentu chi usanta is messaius e is pastoris e est fatu diaici:

Sa Berrita: crutza e longa: est su berretu sardu antigu usau in totu sa Sardigna, fata de orbaci e pannu nieddu e a bortas arrubiu puru. De forma cilindrica, si incrubat asuba de sa conca o si lassada andai asuba de palas, aintru portat una busciachedda po su dinai, su tabacu e su pètini.

Su turbanti: est su muncadori chi si trogat asuba de sa berrita: cun disinnus a froris colorius in diferenti genia e chi beniat annuau a lad’e’ananti.

Sa camisa: fut de linu o tela. Fata in diversus modellus: a ghitarra, a petu frassu, ma is prus usadas fiant cussas a picadillu, tzughitu o colletu, allichidida cun bordadura semplici sa prima e s’atra ( sa de is festas) cun su colletu a puntas piegadas in artu o ananti, de tàllia manna e sciamprosa, maghias largas e sa brutzera plissada o indrollada de unu pitzu chi beniat abutonàt cun gemellus indoraus o in filigrana.

Su cropetu: de orbaci, pannu nieddu o in peddi, a unu o a duus petus, sciallau, cun su collonìu cuncodrau in velludu o rasu.

Sa best’e peddi: bianca(a duas facis) de una parti a pilu longu e s’atra conciada a fini e cun disinnus a froris.

Sa besti longa: niedda, murra o mraxanatza. Si tratàt de sa mastruca, longa giai fintzas a peis fata prus che totu cun peddi de mascu sanau.

Su sacu nieddu: de orbaci grussu, fut su manteddu usau de is pastoris crabaxius e procaxius, chi fadiat de scaciacua e su pilu de sa lana fut ainci a cracu chi no si aciupàt mancai essat fatu temporadas mannas meda.

S’arroda: gunneddedda fata a frungias de orbaci tèssiu a fini o pannu, chi coberriàt su cùmburu de su chintzu in bàsciu, cun asuta s’arratranga o imbraga e finiu e indrollau asuta de velludu nieddu.

Cratzonis de arroda, in linu o tela, stichius asuta de s’arroda, cun còscias largas chi beniat infibaus aintru de is cratzas.

Is cratzas (ghetas): de orbaci o pannu nieddu e a bortas in peddi de sirboni, cun d’una piegadura a lad’e’asuba de velludu nieddu o birdi chi si aberrit po lassai passai su pei e un’orta istichidas benint abutonadas a su costau de sa camba de una filera de butoneddus minninnius.

Su giaconi: de orbaci o pannu nieddu, cun maghias longas e colloniu de velludu o rasu nieddu, longu fintzas a metadi de còscia.

Su colletu (cojetu): casaca de peddi de vitellu conciau.Longa fintzas a metadi e prus de sa camba. Apoderada de una cintura e arricada de duas fileras de butonis de prata o indoraus. Si usàt prus che totu po is diis de festa e un’orta imbeciau po is traballus istravàcius.

Is crapitas: de peddi ligera po is diis de bagantza e ferradas po is diis de intru de cida. Usadas puru cun is cambalis intamis de is cratzas.

Su custumu de is fèminas

De piciochedda, de picioca manna, sposa, de coiada, fiuda, e fiuda scorrutada. Elencaus feti cussus de picioca manna bagadia poita fut de diversas formas, fatesas, arrobas e pannamentas.

Su muncadori: coberri conca semplici de tibei biancu cun ricamus a froris, usau scapiau o acapiau asuta de su runcu. Su muncadori cuadrau, de coloriu grogu, ricamau de froris, si usat scapiau o annuau a duus corrus o cun is abas a punta in artu istichius intra is trempas e su muncadori. Su sciallu, de tibei nieddu e colori de cafei, arricau de meda afrorigiaduras ingespiadas e ingiriau de fràngias longas.

Su turbanti: de linu, tela o de seda arrùbia, usau asuta de su sciallu po apoderai firmus is pilus e podi fissai su sciallu cun dd’una spilla.

Sa camisa bianca: de linu, o tela, a maghias largas, a tzughitu, arricada cun sa guarnitzioni opuru scollada e sciamprosa, cun s’intradò, serrada a lad’e’ananti cun matripellas o ricamada in su peturinu a puntu vanu arripitiu me is brutzeras chi beniant imbidonadas.

Is palas: de brocau coloriu a spompiu cun fundu lillà, fioba o asullinu, a motivus a froris, grogus o arrubius bius, cun dd’unu rosoni a palas cuncodrau de sterlias e su coratilliu in filu de prata serrau ananti de una codruena chi passàt a X in mesu de sa gancera o tampillias fissada e rinfortzada de su scialopu.

Su giponi:crutzu, a mesu maghias, de lana niedda, usau asuba de sa camisa e is pabas e cuncodrau de brocau o rasu nieddu.

Sa gunnedda: sa prus antiga fut de orbaci nieddu, indrollada de una fita de seda, bordada e impretziada cun ricamus de tela fini cun puntus a cuadratus e a puntus a ingìriu nieddus.

Gunnedda de imbodrau, de colori de cinisu arrubiu e colori de ària, e frungida.

Gunnedda de bodratinu: su coloriu prus in vista fut s’arrubiu, cun frungixeddas piticaddeddas a totu longu de susu a bàsciu longa fintzas a carronis e a segunda de su manixu de sa chi dda bistiat mudat de coloriu ( a pesa e croca), fut bordada de arranda de coloriu grogu, inforrada (s’impoiu) in teleta o callancau (tela pintada) indrollada de una fita e si usàt prus che totu cun su giponi.

Su davantali o fascadroxa: de pannamenta a colori viola lillà craru o scuriosu, damascau, bordau de arranda a colori prus che totu sanguìngiu (bordeaux) po is festas sa prima e s’atra prus istravàcia po is diis aintru de cida.

Sa fadreta: bistimentu de asuta de sa gunnedda chi beniat imbidonada, fut de cotoni biancu,ricamada de disinnus a froris e cun is orus arrandaus.

Is crapitas, de peddi fini, niedda e colori de cafei, a mesu tacu, prus o mancu comenti a unu stivaleddu.

Is cuncòdrias: Sa cannaca, is arrecadas, is butonis de filigrana, is aneddus, spillas in prata e in oru, sa ganceria de prata acapiada a is costaus e me is piturras, sa sabègia, regaladas a is pipieddus e medas bortas tentus cuaus asuta de is bistimentas in s’andai de sa vida insoru e usada contras a s’ogu liau e is malis fatus.

Su custumu folcloristicu de Mòguru

Est giai ugualis a is modellus arremonaus. Manchendi s’arroba e pannamenta chi beniat usada in su passau, si est dèpidu arribai a circai de dd’assimbillai a is modellus prus connotus, prus che totu adatendi sa gunnedda aundi si est dèpiu usai su pannu nieddu a su postu de s’orbaci fadendidda prus arrica cun d’una bordadura larga de brocau birdi o arrubiu infrorigiau.