Corpo Pagina

Il complesso pre-protostorico di Cuccurada

Su “smesurau” cumplessu pre-protoistòricu de Cuccurada a Mòguru est intra de is logus nuràgicus prus de importu chi de tempus meda fait parti de is istùdius chi s’Universidadi e sa Soprintendèntzia archeològica ant incumentzau e de siguru si ballit una vìsita de importu mannu.

Su nuraxi de Cuccurada , connotu  de tempus po is circas superfitzialis fatas in is annus ’50 de Giovanni Lilliu e Cornelio Puxeddu, s’agatat in s’atza meridionali de pedra niedda asuba su pranu chi s’incarat a su Campidanu, a su sbocu de su fundali de su frùmini de Mòguru. S’àrea archeològica amostat emergèntzias ispantosas de unu nuraxi cumplessu e de originalidadi , cun medas fabricaus, chi s’ammànniat a tzentru totu a ingìriu de sa turri antiga fatta a “corridoiu”, e aundi a costau si pogiat su bastioni fatu de cuatru turris. Is turris funt aciuntas a pari de murallas deretas chi imprasant una cortilla manna a tzentru, aundi si agatant is intradas de giai totu is localis aintru de su monumentu. Funt presentis in prus, unu fabricau mannu meda de forma tundatza, una muralla manna  a ingìriu e a faci a soli de su nuraxi e arrastu de is istruturas eneolìticas  cun atzas puntudas de arroca in s’atza de su màrgini de su pranu.

Sa circa archeològica, fata de Enrico Atzeni, diretori scientìficu de s’Universidadi de Casteddu, e de Ermenenziana Usai de sa Soprintendèntzia archeològica de Casteddu e de Aristanis, agiudaus de is archeòlogus Ricardo Cicilloni e Giuseppina Ragucci, at fintzas a immoi fatu seti cantieris archeòlogicus, gràtzias a is finantziamentus chi sa Regioni e su Comunu de Mòguru ant giau.  Is traballus de iscavu ant acuntèssiu istratus de isciorrocus a ingìriu de su monumentu e chi serrant s’intrada a is aposentus de aintru e de sa cortilla e fintzas unu muntoni de materiali culturali agatau in is aposentus de is turris e de sa pratza manna a tzentru. De importu mannu is cosas agatadas chi acuntèssint sa vida in su monumentu  e de valori mannu artìsticu e documentàriu  unus cantu ogetus agataus, comenti unu grupu pitichededdu de bruntzu nuràgicu, chi afigurat una iscena de cassa, agatau in dd’una de is turris perifèricas.

S’iscavu de sa corti manna posta a tzentru at bogau a pillu sa presèntzia de barracas de su Bruntzu de Acabu. Custas pògiant, cun murus chi torrant a imperai pedras traballadas e coròngius arrutus de is murus e de sa parti in artu de su cumplessu nuràgicu, asuba fabricaus torraus a fàiri in su Bruntzu Recenti. Atrus interventus ant acuntèssiu su logu ananti a s’intrada de sa cortilla, in sa parti a Sud-Est de su monumentu, aundi s’agatant unus cantu barracheddas nuràgicas, de siguru de ponni in alliòngiu cun is àreas insediativas de aintru.

Comenti chi non fessit bastanti, est de importu mannu s’iscoperta fata in su curridòiu pitiu acanta de s’intràda a sa pratza manna, aundi si est agatau unu muntoni de materiali votivu de s’urtima edadi romana de acabu, chi ammostat testimonias de interessu mannu po su logu aundi funt istadas agatadas e po sa genia de su materiali agatau. Medas is carròcias e barras de brebeis, crabas e fintzas, mancai prus pagu, de bois, e impari a custus si funt agataus puru spillonis de ossu, làntias de strexu de terra interas e spistoradas, monetas in bruntzu e arrogus de imbìrdi de diversa genia e arrastus chi torrant a su IV sèculu apustis de Cristu. Is cosas agatadas iant a parri apartenni a is cultus de is religionis sincrèticas , ammesturadas cun tràgius paganus, cristianus e giudàicus, chi faint a cumprendi ca su nuraxi est istètiu logu de incontru e atòbiu in is sèculus, a pustis puru de sa arrovina sua.