Corpo Pagina

Gruppo Freccia Mogoro

Su giogu de su palloni est su sport prus antigu pratigau de is mogoresus, abi a ingiriu de is annus binti de su seculu passau unu scantu piccioccus volenterosus hiant cumenzau a ddu pratigai.

Sa bidda de Moguru essendi sa prus manna de su Part’’e Montis Marmilla, in tottu is tempus est istada punta a innantis, de ghia, testimongia e partera de giogadoris balentis e famaus chi in tottu is tempus hant fattu bisai e spassiai is che dd’hant pratigau organizzau e gosau cumenti a tiffosus. Sa storia de is novas de is urtimus tempus chistionat de unu trasinu longu de frimmada po nexi de sa mancanzia de su campu e de ainci una bella cambarada de personas biazzas bidenti s’abbandonu e trascuradesa de medas giovunus interessaus a su giogu de su palloni, hiant dezzidiu cun gana e volontari de formai una sozziedadi noba cun s’idea de praticai custu sport pruscatottu po scopus sozzialis e no feti po il risultaus chi si hant’essi pozzius arribbai.

E po custu in su 1998 fut pozzida nascit sa sozziedadi S.S. Mogoro. Is risultaus in pagu tempus fiant istaus bonus. Si fut arrennesciu a pigai parti giai de tottu is campionaus giovanilis,mancai po ammarolla fessant obbligaus a giogai me is campus de is biddas de foras e pruscatottu a Pompu. Sa gana, s’arranguizzamentu e su prexu de tottu is dirigentis nci fut pesau in artu e arranguizzaus de custu fattu si fut arrennescius a fai pigai interessu a prus de centu giovunus di edadis diversas de is ses annus a is sexi me is campionaus giovanilis e in prus sa prima squadra puru hiat cumenzau a pigai fama e otenni arrisultas mannas tant’e berus ca de sa terza fut passada bincendi su campionau a giogai in Seconda Categoria.

In su 2004 si fut prosighiu cun sa politica laudada de interessamentu asuba is giovunus de is biddas de accanta. De inguni fut nascida s’idea de una ghettada a pari in su (sposoriu) tra sa sozziedadi de Moguru e Folgore Gonnoscodina chi a pustis tempus fut istada cambiada de nomini cumenti a Folgore Mogoro. Is risultas no si fiant fattas abettai: oi si pigat parti a tottus is campionaus de sa F.G.I.C e a pustis unu trasinu pistighingiau e de importu in su 2005- 2006 sa primu squadra est istrada prommovida in Prima Categoria abi oindì giogat ancora.

Sa sozziedadi hat otenniu arrisultas mannus e de callidadi in su settori de is piccioccheddus e una dexina de custus giovunus giogadoris in frori funt istaus annodizzaus e scioberaus e immo benint sighius e giogant in su vivaiu de sa squadra Cagliari Calcio cun promitenzia manna. Funt is isperas de cras, no feti po sa bidda de Moguru e po is atras de accanta, ma po cantus creint chi pratighendi custu giogu spantosu in gioventudi in s’andai de su tempus si pozzant formai e affottiai in s’anima e in sa menti po podi gosai in su benideru is fruttus nodius abettaus.