Corpo Pagina

Associazione Musicale Mogorese

Presidenti e maistu da sa banda: Marco Pia

Sezioni: via Pergolesi 46 Mogoro – Via Martini

E-mail: marcopiaservice@tele2.it

Tel: 348 5306623

Musica, ma no feti. Storia, usanzias, custumanzias e arregodus. De tottu sa bidda. Est custa s’Assocciazioni musicali mogoresa in su centru prus mannu de su Part’’e Montis- Marmidda. Fut in su tempus attesu de su 1912 candu Crallus Sanna, Sisinni e Diegu Paderi, is nobilis de sa bidda, hiant pensau de criai sa banda musicali. S’idea fut praxida meda a sa genti tant’e berus ca s’arregorta po podi comporai is istrumentus musicalis fut istada manna e nd’hiat pigau parti tottu sa bidda. Puddas, ous, trigu e atrus loris e callincunu soddixeddu priccurau, fiant finidas in sa cascia de su comitau e de ainci si fiant pozzidas comporai is trobas, tamburrus, flautus e is atrus istrumentus chi serbiant a is sonadoris noeddus prenus de gana e biazzori.

Cun Angelu Ruffi, su primu maistu de musica (“continentali” cumenti chistionant is paperis allogaus de cuscus tempus), sa banda hiat donau s’inghizzu a is primas sonadas: fut sa di nodida de Pasca Manna de su 1913. Su prexu cundiu de cuntentesa de mannus e pitius fut istau meda candu cun is ogus alluxentaus is primus sonus hiant segau s’aria spraxendisidda e rrettronendi in tottu sa bidda. De issà sa banda, a bentu in puppa e coidadosa, hat sattau duas gherras, su tempus fascista e sa nascida de sa repubblica senza mai mancai a una festa o unu spassiu in sa bidda : S’incontru po Pasca manna, su battiari de su depositu chi ndi portat po sa prim’orta s’aqua disigiada me is grifonis aintru de sa bidda, is prucessionis po is festas de Santu Brannadiu, Sant’ Antiogu, Santa Maria Cracaxia o de su Cramu e is passilladas foras de bidda de is sozzis in cumpangia de is cambaradas festantis de is mogoresus. Sen’’e contai is sonadas po sa di de is mortus e de pagu tempus po is festas nodidas de paschexedda.

Funt passaus giai norantaquatr’annus. Medas cosas in s’andai de su tempus funt cambiadas, ma in s’era de internet, dvd, cd rom e effettus specialis, non c’est festa o momentu nodiu abi sa banda no fazzat intendi is sonus armoniosus o cadenzau de is marcettas po su prexu de is pipius, giovunus e anzianus. Est suzzedidu in su passau e cun spera manna hat a prosighì. Poita ancora funt presentis is giovunus iscientis chi cumbidant impari a tottu is sonadoris e is maistus galanus chi in su tempus hant fattu de ghia a sa banda, a aprosighi is sonadas cun is nodas chi una di nonnus e babbus nostus a spompiu mannu hiant intonau po su bollori e gosu de is popolaus nostus. Prosit!