Corpo Pagina

Novità per la celebrazione dei matrimoni civili

S’isposòriu, siat tzivilis o religiosu, est una de is cosas prus de importu de sa vida de una fèmina o de unu òmini.

Circhendi de acuntentai is disìgius espressadus de unas cantu còpias mogoresas, sa Giunta comunali at agatadu logus nous aundi s’ant a podi tzelebrai is matrimònius tzivilis, in prus chi, cun naturalesa, su munitzìpiu de bia Leopardi.

Duncas de immoi s’isposòriu tzivili at a podi èssiri tzelebradu:
– In su tzentru de acullièntzia de s’àrea archeològica de Cuccurada, pighendi in cunsideru sa cortilla afaci puru;
– In su tzentru de sa Fiera de su tapetu in pratza Màrtiris de sa libertadi (in su perìodu de sa Fiera de su Artìgianadu Artìsticu e de su Tapetu de sa Sardigna is oràrius e is modalidadis de su ritu tzivili sunt de cuncordai cun is ufìtzius comunalis)

Cunforma a sa norma s’isposòriu podit essi tzelebradu de su lunis a su sàbudu de is 8.00 a is 18.

Pròpiu sàbudu 25 de ladàmini at a essi tzelebradu su primu matrimòniu a Cuccurada.

Sa tzerimònia at a essi ofìtziada de Francesco Serrenti, amigu de is isposus e delegadu de su Sìndigu de Mòguru, sighendi sa domanda de is isposus.

Non totus iscint, difatis, ca su Sìndigu, chi calincunu ddu pedit, podit delegai sa tzelebratzioni de s’isposòriu a cali si siat tzitadinu italianu chi tèngiat is rechisitus po podi essi elìgidu in is Consillus Comunalis.