S’Ufìtziu lingua sarda de su Comunu de Moguru adit torrau at aberri mercuris 1 de su mesi de Argiolas 2009 a pustis sa serrada fata in Friargiu pro sa maternidadi de s’operadore.

Ma ita est custu Ufìtziu lingua sarda de su Comunu?

Sa Lei Regionali n. 26 de su 1997 impari a sa Lei n.482/ 1999 ant arreconnotu sa lìngua sarda cumenti espressioni de s’identidadi culturali de sa Sardìnnia, donendiddi sa matessi dinnidadi de sa lìngua italiana.

Ma mancai su sardu siat ispainau in dd’una parti manna de sa Sardìnnia (poita in Gallura, in sa zona de Sàssari, me in Alighera, in Carluforti e Calaseta no chistionant sardu, ma àtras lìnguas), unu perigulu mannu est cussu ca su sardu siat abbandonau po arrexonis culturalis, sotzialis o econòmicas.

Duncas, sa de sa lìngua sarda no est una chistioni linguìstica e sotziulinguìstica feti, ma fìntzas unu problema polìticu e culturali poita sa lìngua est su princìpiu de s’unidadi e de s’identidadi de is sardus. Ainci, su de lassai sperdi sa lìngua sarda est unu pirìgulu chi depeus circai de stesiai, cun sa cuscièntzia de chini cumprendit ca seus arrischiendi de perdi una parti manna e importanti meda de nos etotu e de su nostru essi sardus.

Pro custas arrexonis, toccat a afortiai su processu de defesa, promotzioni e avaloramentu de sa lìngua nostra e toccat chi is fainas lompant a pertocai totu e totus, a cumentzai de is fueddadoris fintzas a arribai a is famìllias e a is istitutzionis e duncas totus is setoris de sa vida pùblica e privada de sa comunidadi nostra.

Su Servìtziu de sportellu linguìsticu est naschidu propriu pro circai de fai intrai sa lìngua sarda in sa Pùblica Amministratzioni gràtzias a sa Lei 482 de su 1999 e serbit puru pro incumantzai  a ddi donai visibilidadi e pro si torrai a abituai a usai su sardu in ònnia cuntestu de sa vida pùblica e privada.

Pro circai de fait custu, s’ufìtziu lingua sarda de su Comunu de Moguru circat de trabballai impari cun is Servìtzius linguìsticus de is atrus comunus, asuta de su cuntzertu de s’Ufìtziu de sa lìngua e de sa cultura sarda de sa Provìncia de Aristanis e de cussu de sa Regioni Sarda.

Su sportellu linguìsticu de su Comunu de Moguru, chi est apetu de austu 2007, circat de trabballai a cuncòrdia cun s’Ufìtziu de sa lìngua sarda de sa Provìncia de Aristanis po tutu is fainas chi pertocant s’impreu de sa lìngua in ònnia cuntestu de sa vida pùblica e privada de sa comunidadi, fait furriaduras,  giait informatzionis e spainat materiali in lingua sarda a ufìtzius e citadinus, approntat sinnalètica, avisus e atru materiali de informazioni. In prus, cun s’organizatzioni de is cursus de lingua sarda, circat de fai in modu chi su personali de s’Enti e cali chi siat atru sugetu de sa comunidade chi tenint interessu, potzant manigiai, in su fueddai e s’iscriri insoru, sa lìngua sarda aintru de s’Enti etotu e me in is raportus cun s’utenza.

Su Sportellu linguisticu, chi si agatat in su primu pianu de su Comunu, in bia Leopardi 8, est a dispositzioni de ufìtzius e citadinus po cali si siat informazioni asuba de sa lìngua sarda:

Martis:  9 – 14                   Giobia: 9 -14  15-17

Pro chini oit telefonai o scriri:

tel:0783 993007

e.mail: sportello.linguistico@comune.mogoro.or.it ;