Salta la barra di navigazione e vai ai contenuti
Artigianau e stima de is custumanzias e de is artis de su passau. Capassidadi e futtesa in su traballu de custas artis de sa Sardigna nostra. Funt custas is crais de s’arrennescimentu de sa fiera de su tappetu de Moguru chi at a aberrere po is appassionausu de is cosas fattas a manu cenabara 3 de austu 2007 a is 19,30. Po segàret su nastru de s'inghitzu impari a su sindigu Gianni Pia e a s' amministratzione comunale chi ant organizzau sa manifestatzione ci at a essere s'assessore regionali de is traballos publicos Carlo Mannoni. Aratzus, tappetus, cassapancas, prendas e prodotus de su cocinare nostru ant a abarrare in ammostru in pratza de is Martiri de sa libertade totus is dies de is 10 a is 21 fintzas a lunisi 27 de austu.
Fiat su 1961 candu unu scantu tessingianas e maistus de linna guidadas de su sindigu de cussus tempus Efisiu Lippi Serra e de s’amministrazione comunale iant cuminzau a donai fida a custa importanti e famada fiera de su tappetu.
Su scopu fut istau de torrai a bogai a pillu custas artis nodidas de s’antigoriu e de ainci podi educai sa genti arranguizzendiddus a prosighi custas artis senza de traixi is genias de traballamentu de is modellus disignus e mostas chi iant sinnau sa storia de is popolaus de is logus nostus. Propriu cumenti si liggit is sa cartolina de cumbidu de su 1962 po su segundu annu chi si fut fatta. Po tres annus sa fiera fut durada feti su 19/20 e 21 de maju propriu is tres dis de festa de Santu Brannadiu, patronu de Moguru, e pustis unu trasiu de 15 dis e pustis ancora fut duràda po tres cidas, cumenti mudada puru est istada in s’andai de su tempus sa data de abertura e serrada chi si est passaus de su mesi de maju a su de austu po arribbai a dda fai s’urtima cida de su mesi de argiolas a sa prima cida de austu, prosighendi a pustis de dda lassai aberta finzas a is dis prima de s’Assunta (ferragostu).
Est unu momentu bellu de attobiu po is comporas e sa cultura, pruscatottu po medas sardus istrangius e turistas chi approbiant de ognia logu no feti po si gosai su mari, is montangias e su sobi ma po fai comporas de custas prendas nodidas de custas artis e mestieris. E propriu grazias a custas beridadis chi sa idda de Moguru est de tempus connota cumenti a logu importanti de incontru de is artis e mestieris de tottu sa Sardigna, fadendisi apprezzai in continenti, in s’europa e in su mundu. De su 1966 sa fiera s’est aberta puru a is atrus artisanus de atrus logus de sa Sardigna e ammanniendi is apposentus hat pozziu accabidai atras oberas artisticas ingegnosas donendi puru sa possibbilidadi de bi’ e aprezziai mellus tottu custus traballus postus in ammostu. A cumenzai de s’annu 1961 sa mostra beniat fatta me is localis beccius de sa scolla media, a dus passus de sa cresia de su Cramu, a pustis callincun’annu fut istada tramudada in su casamentu scolasticu de is elementaris in prazza de Sant’Antiogu, inni fut abarrada po annus meda, grazias pruscatottu a is amministrazionis comunalis, a is direttorias artisticus e a s’aggiudu preziosu de sa “Pro Loco”, sa Cantina il “Nuraghe” e e su Premiu Litterariu “ Marmilla”, ottenendi aprezziu mannu de parti de sa genti e de is criticus de tottu is logus. Cun is traballus de arrangiamentu de custus localis, in su 1995 sa fiera fut torràda a is localis nous de sa scolla media, po teni s’approdu a pustis in su 1999 in su Centru Polifunzionali chi est istau fattu a posta po arriccì sa vetrina de s’artigianau me is localis atrezzaus cumenti si spettat abi sa scenografia de is ammostus benit curada e sighida cun futtesa e capassidadi manna de s’enti “Isola” e massimamente de su responsabili artisticu Martinu Poggiu.
Ma sa fiera ollit nai puru momentus de intrattenimentus. A issa est istau integrau su calendariu de is attobius culturalis e artisticus: sonus, cantus, ballus poesias, presentazioni de librus, teatru e atrus intrattenimentus de s’istadi mogoresa chi agatant sciogu proprou in custa vetrina importanti. No feti. Po custa editzione 2007 ci ant a essere puru un ammostu de sa pintura de s'artista Dina Pala impari a su laboratoriu asuba a is ritrovamentus fattus me in su nuraci de Cuccurada chi funt in ammostu in su museu comunali chi ant abetu de pagu tempus me in cunventu becciu, acanta a sa cresia de su Cramu. Custos ammostos ant a abarrare abetos po cantu ada a abarrare aberta sa fiera de su tappetu.
