Moguru. Parriàda che su celu si fiat firmadu. Sa genti fiat a bucca aberta. A pustis iat cumantzau a battere is manus sena si podere firmare prusu. Aici iant fattu millecincughentus personas (e fortzis de prusu) sabudu 28 de su mesi de argiolas po narrere che iant aggradessiu meda su spettaculu “Antigone” presentau in su situ archeologicu de Cuccurada da is attoris de sa cumpangia teatrali Teatro Tragodia de Moguru guidausu de sa regista francesa Kathy Marchand. E no podiat essere che ainci.

Su nuraci de Cuccurada fadiat de isfundu a s'opera teatrali e cun totus is luxis e sa musica parriat torrau a una vida noba. Cussa vida fiat arragallada a su nuraci da is scavos e is traballos fattos fare de su comunu de Moguru, cun s'agiudu fidau de Enrico Atzeni e de Ermenenziana Usai de sa Soprintendetzia archeologica de Casteddu e de Aristanis. No feti: po cust' ocasioni vida e spiritu novos si ligiant in is ogus de totus gratzias a sa recitatzioni fatta cun su coru in manus de is giovunus attoris mogoresus appiccaddaus asuba de is perdas mannas e de is muros millenarios de su nuraci chi dominat su Campidanu. Duncas, un'apertura a su popolau bella diaberus cussa fatta sabudu a merie cun custu spettaculu “Antigone”pigau de un'opera de Sofocle chi tenet fama manna adatada a is modus de pentzare e ai sentimentos de oe in die e pruscatotu a is idealis de paxi e giustitzia chi is omines sighint de is tempus passaus. Un ammesturu mannu chi, impari a su faeddare in sardu e in italianu, si aciungiri a su aere decidiu de fare de su nuraci unu palcu prenu de cultura. Una decisione boffida de sa cumpannia Teatro Tragodia impari a s'amministratzione comunale e pruscatotu a su sindigu Gianni Pia chi ant organizzau sa manifestatzione. Custu poita fare de su nuraci de Cuccurada unu palcu est istadu cumente a ddi torrare a donare unu ruolu de importu mannu in sa vita de sa comunidade mogoresa. Ma custu no feti po unu merie. Sa sperantzia est chi custu ruolu agiudidi a donare unu importu mannu a sa bidda e a sa comunidade mogoresa. E pruscatotu ca is turris meravigliosas e solas in su mundu potzant diventare unu logu connotu de genti meda aundi fare manifestatziones istoricas e de cultura e no feti logos bistos e appretzados de is turistas. Aici unu passu in custa bìa est istadu fatu. Imoe tocat a ndi faghere unu antru: ponere a postu is postegios, aberrerre a totu sa genti su centru servitzios e su situ archeologicu cun bisitas guidadas. E totu est de fare forzis intra s'istade 2008.