Carnevali mogoresu: is Merdules Betzos de Otzana in giru po sa bidda
Su Carnevali cumenti si fadiat in su tempu passau. E cun i saporis antigus. Est custu su nomini de sa festa po su carnevali mogoresu chi su cumunu impari a is associatzionis Mogoro Danza, Agesci (Scout), oratoriu de Santu Bernardinu e Motoclub Su Nuraxi ant organitzau po sabudu 9 de Friaxiu. A partì de is quattru de merì de sa pratza de cresia s'at a partì tottus impari, mascareddas e merdules betzos de Otzana. S'at a passai in sa bia de su Cramu, in bia Lussu, in bia Gramsci, in pratza Sant'Antiogu, in bia Tuveri, in bia delle Aie e in bia Martini, po torrai in bia Gramsci e in pratza de cresia. S'ant a fai tres frimmadas: in su pottabi de tzia Olga po pappai fà a lissu, in domu de tzia Segunda po tastai minestra de fasou e in su magasinu de Tziu Luiginu Brigas po su ciciri. A pustis, in pratza de cresia c'ant a essi zippuas e binu po tottus.
