Sa Sardigna est cumenti a unu continenti, e mancai siat pitiu de trettu ammostat tottu is differenzias suas geologicas, idrograficas e finzas culturalis. De custas differenzias funt nascias diversas callidadis de prodottus in is diversus settoris, e una de custas spezziffizzidadis est s’axia chi dui crescit e su binu chi si produsit.

Moguru in cust’arti nodida no est seconda a nemus poita tenit sarmentus chi benint de s’antigoriu cumenti a su cannonau, nuragus e semidanu, chi si podint anodizzai cument’e arrazza sarda. Atrus funt Fenicius, Punicus e Ronanus, atrus ancora cumenti a sa mora niedda, canniollariu e su bovabi benint de sa Catalogna e s’Aragona e Grecus Bizantinus funt sa Mallavasia, su gregu e atrus.

Me is satus de Moguru funt presentis puru atras arrazzas de axia connotas de s’antigoriu e propriu poita no si scit assaretta de abi siant pozzias arribbai, hiant a minesci giustus istudius e cracullamentus po ndi podi comprendi sa storia insoru chi in parti est sa storia nosta decida e importanti.

In s’abettu de atrus istudius, elencaus is binus chi si produsint in sa Cantina “Il Nuraghe” e in bona parti, is axias antigas presentis is is satus Mogoresus abi de tempus is mannus nostus hanti traballau cun abbilidadi e sacrifiziu mannu lassendi in arenzia cus’arti antiga. Cumprendendi ca is terras de is coddus, costeras e pranuras, cun is arenas bobadrixis, impari cun su sobi, su frummini e is istasonis chi si accumpangiant, siant is segretus de su binu callidadosu nostu, chi giai de su 1956 hat pigau nomina manna, benendi appreziàu e premiau no feti in Sardigna e is continenti, ma connottu in tottu su mundu, donendi nomina manna asa idda de Moguru, a sa Cantina e a is bingiatteris capassus e futus.Nominis de is binus

Nominis de is binus

• Puisteris: Semidanu de Moguru Doc fattu feti de de axia de semidanu sceràu. Aguantat prus de u’annu. Su coloriu est grogu crarongiu, profumau meda e fruttuau. Su gustu est siccu e dilicau e mudat su sabori a pustis buffau lassendi su gustu po una bella scappada. Si sposat beni cun pezza de diversas callidadis, mandiaris marinus, coccioba, vangellida, ostricas e atrus...
• Chio: Cannonau de Sardigna Doc fattu de axia de Cannonau sceràu e lassau stasonai po 8 mesis in sa carrada (barrique). Est de coloriu arrubiastu cottu, sanguingiazzu, callidu e siccu. Si crosat beni cun sa pezza de cassa e arrostida. Est bellu e praxibi po buffai foras de pastu puru e s’accumpangiat cun casu sardu de brebei stasonau.
• Nabui: Mora niedda (monica) de Sardigna Doc fattu cun 85% de mora niedda sceràda e su 15% de bovabi, lassau stasonai po 8 mesis in sa carrada. Est de coloriu arrubiastu cottu appenas sanguingiu, de gustu siccu e forti. Est unu binu inzettau po sa pezza de cassa manna e pitia e pruscatottu arrostida, su casu chi ddi scrosat est su de brebei stasonau.
• Vignaruja: Cannonau de Sardigna Doc fattu feti cun axia de Cannonau. Est de coloriu arrubiastu e sanguingiu. Si sposat beni cun sa pezza de cassa manna e pitia, pruscatottu arrostida su casu prus inzettau est su de brebei stasonau.
• San Bernardino: Mora niedda de Sardigna Doc fattu cun Mora niedda de Sardigna 85% e su 15% de Bovabi. Est de coloriu arrubiastu cottu e callidu, cun profumus chi arregodant sa mura de arrù. Est inzettau cun sa pezza de cassa e arrostida. E su casu giustu est su de brebei stasonau.
• Anastasia: Semidanu de Moguru Doc fattu feti cun axia scerada de Semidanu. Est a coloriu grogu craringiu, su gustu est siccu e dilicau. Est binu chi crosat a mandiarisi coxinaus in maneras e genias diversas e a tottu is atras pezzas, a sa coccioba, vangellida, gotillonis, e atrus mandiaris marinus.
• Don Giovanni: Vermentinu de Sardigna Doc fattu feti cun axia de Vermentinu. Est de coloriu grogu u pagheddu birdanciu, liggeru, chi a pustis buffau fait intendi una punta de marigosori. Est su binu chi si sposat beni cun is antipastus, su pisci e su casu prus inzettau est su de brebei drucciazzu.
• Ajo: Nuragus de Casteddu Doc fattu cun is axias de Nuragus. De coloriu grogu birdanciu craringiu, de gustu fruttuau meda e andat beni cun is antipastus marinus e su pisci.
• Tiernu: Campidanu de Terraba Doc fattu cun axia de Bovabi 85% e su 15%cun axias de atras callidadis. Su colloriu est arrubiastu cottu, de gustu dilicau e siccu, si sposat beni cun sa pezza de cassa, de atrus pegus arrostius e su casu de brebei stasonau.
• Colle Moresco: Mora niedda de Sardigna Doc fattu feti cun axia de Mora niedda. De coloriu arrubiastu crarongiu, siccu, cun profumu de mura de arrù. Est inzettau po mandiaris arrostius e sustanziosus e su casu de brebei stasonau.
• Tholos: Binu arrubiastu IGT Isola dei Nuraghi fatu cun axias de bovabi e mora niedda. Su coloriu est arrubiastu craru chi donat a su sanguingiu lucenti (pedrixinu). De gustu fruttuau meda. Est unu binu inzettau po is primus mandiaris, cun bagna, pezza cotta a cadriga e angioni arrostiu.
• Le Giare: Vermentinu de Sardigna Doc fattu feti cun axia Vermentinu. Su coloriu est groganciu e dilicau, de gustu siccu e adizzu fruttuau. Si crosat beni cun is antipastus e cun su pisci.
• Gregorius: Binu biancu IGT- Isola dei Nuraghi fattu cun axia Nuragus, Vermentinu e Semidanu. Est de colloriu grogu, craru, lucenti. De gustu siccu. Andat beni cun is antipastus liggerus, cun s’arrosu, mandiaris marinus e pezza liggera.
• Semidanu – Spumanti - Siccu: fattu fetti cun Semidanu de Moguru. Su colloriu est grogu craru indorau. Su gustu est siccu e praxibi, andat beni cun s’arrosu, alagusta, cavuru, longhiffanti, cambaredda e atrus de cussa callidadi e genia e po puru po atrus mandiaris marinus.
• Mallavasia - Spumanti: Est unu binu biancu spumanti profumau e dilicau, fattu feti cun axia de Mallavasia, a colori de oru lucenti, de gustu drucci e forti e si accumpangiat beni cun druccis pruscatottu de mendua e frutta siccada o pabassada.
• Capodolce: Muscau de Sardigna Doc fattu feti cun axia de Muscau o Muscadeddu. De colori grogu indorau. Su gustu est prenu, praxibi, drucci e pagu frizzanti. Andat buffau a tastadura cun druccis, frutta siccada o pabassada e trutas, crostata, panettoni e cun casu de brebei drucci stasonau.
• Prima macerazione: Binu noeddu IGT- Isola dei Nuraghi fattu de Mora niedda e bovabi. Est de colloriu arrubiu dilicau e su gustu est siccu e appenas frizzanti. Si sposat beni cun is mandiaris de s’attongiu, codroiu, castangia, anguidda e pezza de angioni.