Fregua sarda cun codroiu e brodu de pezza de brebei a sa mogoresa

Sa cantidadi po 6 personas:

• 800 grammus prus o mancu de simbua
• 1 chillu de codroiu: de feurrazzu o feurrazzeddu, de tuvara de minda o tuvaredda, o puru codroiu de padenti e si fait tuvara de arena
• 1 chilu de pezza de brebei o mascu sanau
• unu spizzu de zafferanu
• carota
• cibudda
• apiu
• pibadra
• pedrusemini
• tamatiga frisca madura

Preparamentu:
In d’una pingiada capassa si ponit sa pezza de brebei o mascu sanau segada a incueddus coberrendidda de acqua su tanti bastanti e in su matessi tempus si acciungint is varias birduras: carota, cibudda, apiu, pibadra, pedrusemini, e unu scantu tamatigas friscas beni maduras.
Si fait coi sa pezza a puntu giustu e si usat su brodu po fai sa fregua chi depit essi preparada in custa genia: si spraxit a bellu a bellu sa simbua in d’una pianedda bascia e lada, si sciundit in candu in candu cun acqua sabida abi si est giai postu unu pagheddu de finiallas de zafferanu, si fait passai in trà mesu de is didus sa simbua manixendu a furriu a furriu e a bellu a bellu s’hant a formai granus prus o mancu cumenti a s’arrosu. Sinci ghettat tottu in d’unu sedazzu in modu de prugai sa simbua chi no s’est ancora ghettada a pari e pustis si ponint is granus de sa fregua asuba de unu pannu a facci a sobi o in d’una tellia aintru de su forru po dda podi asciugai.
In d’una cassarolla si fait su cundimentu cun allu, cibudda, e tamatiga, sinci acciungit sa bogadura de proccu e su codroiu, si ponit sa fregua, e si acciungit su brodu preparau cun pezza de brebei e candu sa fregua est giai cotta sinci acciungit e spraxit una bona puiada de casu de brebei ammisturau cun pedrusemini affittau a piticcu. Si ponit sa sabi su tanti chi serbit e su mandiari est bellu e prontu. In d’una pingiada capassa, a secunda sa cantidadi de is personas si ponit pezza de brebei o - mascu sanau - affittada a incueddus coberrendidda de aqua su tanti bastanti e in sa matessi scappàda bisongiat a acciungi is varias callidadis de birdura: carota, cibudda, apiu, pibadra, pedrusemini, e unu scantu tamatigas beni maduras.

Angioni cun gureu de sattu a sa mogoresa

Sa cantidadi po 6 personas:

• 1 chilu e mesu de pezza de angioni
• unu pagu de ollu de obia e unu cullera de ollu de ladru scallau
• 1 tassa de binu biancu, chi faidi ”semidanu" o "mora bianca”
• 1 sibiqua de allu
• pedrusemini e sabi su tanti chi bastat
• una bella cantidadi de gureu de sattu

Preparamentu:
Si segat a incueddus sa pezza de s’angioni, pustis si ponit a arrubiài in d’una cassarolla, cun ollu de obia, e oll’e ladru scallau, s’allu iffitau e pedrusemini. Candu est beni arrubiàu si sciundit tottu cun d’una bella tassa de binu biancu, si sighit sa cottura acciungendu incandu in candu unu pagheddu de brodu. Arribbaus a mettadi de coidura sinci acciungit su gureu preparau giai de innantis in custu modu e genia:
si circant in su sattu unu scantu fundus de gureu, si pullint de sa spina e si scroxat, si segant a incueddus is costallas e sinci ghettant in s’acqua e succi de limoni po no si annieddigài. Si ghettat acqua in d’una pingiada cun d’unu pagheddu de sabi e candu scapat a buddì sinci ghettat su gureu e si lassat coi po unu scantu minutus, a pustis si scobada e sinci acciungit a sa pezza de s’angioni. Si prosighit sa coidura morichendi i e manastendi tottu impari, si acciungit sabi su tanti giustu e pustis cottu si serbit su mandiari beni callenti pappendiddu chi fait cun pani arridau e battiendiddu a prexeri cun binu biancu o pedrixinu, de Moguru.