Is festas de carnovali cumenti si scit tenint arrexinis antigas, e medas funt is genias po dd’affestai. In su tempus passau in medas biddas de Sardigna si curriat su “Sattigliu” chi derivat de assaltu,assartigliu, assattillai (assaltare-tenzone) e no de sorti, cumenti nant sbagliendi certus istudiosus.

Sa cursa de is cavalieris chi currint a quaddu mascheraus cun d’unu fusti in manus po circai de intinnai unu caboniscu apiccau a conca in basciu cun d’una funi a conca o puru a una pingiada de strexu de terra cun aintru sorpresas e brullas de ognia genia, chi si narat ”segai is pingiadas”.

Custa usanza chi benit de s’antigoriu a e cantu nant is anzianus prima de dda curri a Oristanis si fut fatta a Crabas,Santu Aingiu,Seddori,Sardara, Uras e Moguru.

Tottu logus de importu mannu in is tempus de is Giugis de Arborea chi giai a tot’annu biviant in custas biddas poita fianta logus de frontera. Tant’est berus ca sa idda de Moguru me is documentus antigus benit arremmonada cumenti a ”VILLA NOSTRA DE MOGORO”.

Su sattigliu un’orta proibiu de bocci’ puddas e cabonis e in mancanza de quaddus no si fut cutta prus(fut istada torrada a tentai un’antr’orta ma fut durada feti un’annu), In mancanza de tottu custu is Mogoresus si fiant donaus a organizzai su carnovali in diversas genias: cun carrus allegoricus, gruppus mascheraus e tropparas de figurantis mascheraus in costumu.

Fut unu divertimentu importanti abi partecipanta tottu is biddas de accanta. Custu movimentu puru si fut firmau e immou grazias a su “Gruppu Ippicu Mogoresu” est torrau a nasci su Sattigliu.