Santu Brannadiu est su patronu de Moguru. S’affestat su 19, 20 e 21 de maju. Est sa prus intendia de is mogoresus. A is tempus de oi puru approbiat genti de ognia logu e in custus urtimus tempus, impari a is emigraus, finzas turistas, chi si acciungint a is atrus devotus de su santu.

A sa prucessioni e a is missas 'dui andat sa genti a truma. E grazias a is comitaus e a sa Pro Loco si funt pozzias appoderai is usanzias e custumanzia de su connottu, cumenti a sa presenzia de is quaddus e bois a sa prucessioni e s’attobiu chi si faidi a pustis po premiai is traccas, bois e quaddus cuncodraus chi nd’anti pigau parti.

De importu mannu est sa presenzia de is duas crunfarias secularis, bistidas cumenti a s’antigoriu chi intonant cantus cumenti a quattruxentus annus faidi e is priorissas, chi impari a is atras femmias chi andant a sa prucessioni, faint intendi su cantu delicau de s’arrosariu, arrespostas de is ominis accaffaus a brazzettu chi, a su contrariu, cantant a boxi tirada cumenti a is crunfaras in lingua sarda mogoresa.

Sa statua de linna indorada de Santu Brannadiusu, ingiriada de lillus biancus donaus po promitenzia de is fidelis po is grazias accanzadas, passat in tra mesu de sa genti in sa ia arramada e inbandierada e de is follas de is arrossa sciolladas ghettadas asuba de su santu chi benit accumpangiau puru de sa banda musicali e is gruppus folkloristicus.

In d’ognia ingruxeri, me is gutturinus e bias sa genti a biga s’i ngianungat e pregada in mesu de is testus de froris, arazzus, tappetus, fanigas e lenzolus arriccamaus spartus in is fentanas e is portalis, a bì Brannadiu Santu de Siena “Mogoresu”, portau a coddu de sa crunfaria, e accumpangiau de is autoridadis e sodighiu de una truma de genti, passat trionfanti in custa prucessioni spantosa benedixendi tottu su popolau.

Est una festa ricca e abettada, prena de imbentus e apparicciamentus nodius: fogus artificialis, garas poeticas, sportivas, cummedias in lingua sarda, ballus e cunzertus, ammostaus e bivius in tra mesu de barraccas e paradas e s’anda e torra de sa genti passillendi chi sincontrant, ganosa e prexada po si cumbidai e pruscatottu po ti nai: “augurius e atrus annus mellus!”