Sa festa de sa Madonna de su Cramu fi fait in sa cresiedda romanico gotica intitulada propriu a issa abi accanta e a su costau ddui est su guventu carmelitanu chi fut de meda serrau e immoi megant de ddu arrangiai e mudai secundu gustus e abbisongius po essi prontu cumenti a museu e podi accabidai pruscatottu is oggettus archeologicus de ognia genia agataus in su sattu de Moguru.

A parti is funzionis religiosas, is prazzittas chi funt presentis ananti e a pabas de sa cresia permittit de donai possibbilidadi a is gruppus folkloristicus, de teatru, de sonus e cantus e atras artis spassiosas eculturalis de ognia genia po podi ammostai sa capasidadi insoru.

Custa festa, in su passau fut una de is prus de importu de is logus nostus, e si disfidàda cun sa festa de Santa Maria de Uras po tottu is giogus chi portanta, ma pruscatottu po sa cursera de is quaddus curridoris abi is cavaliggeris prus capassus circanta de binci su pannu prus famau po ndi teni arregodu mannu sa di e me is tempus benidoris. Custa festa, nodida in su passau, po nesci de s’incuria de sa genti o poita d’azzedit in tempus de mari, no fut istrada prus cracullada. Grazias però a unu scantu femmias biazzas chi si funt organizzadas in comitau, in custus urtimus annus est torràda a essi affestada cumenti si depit cun cuntentesa manna de sa genti.