Moguru ollit nai pruscatottu artis e mestieris. De arazzus e tappetus. Ma puru de scannus, cadiras, casciapancasa, mesas e atra mobilia intagliada, prendas de sa futtesa antiga de sempri traballadas de is artigianus mogoresus.

Cumenti scridi Francescu Sonis in su libru Mogoro: due secoli di vita municipale in su 1835 a Moguru ci fianta 600 trobaxus chi tessianta lana e linu mancai sa popolazioni fessat de appenas 2 milla animas.

E su zacchidu de su trobaxiu si podiat ascuttai in medas domus mogoresas finzas a una dexina de annus faidi, arregodu de cust’arti nodìda passada de mamma in filla. E propriu po sa stima de cust’arti antiga chi a s’agabbu de is annus cinquanta unu scantu femmias ingenniosas e futas de Moguru cumenti a Zia Efisia Ariu, Zia Gennesia Frau e Zia Ernesta Anedda hiant organizzau cursus de tessingiu chi hiant donau sa possibbilidadi a is giovunas iscientis de torrai a imparai su traballu de is arazzus e tappetus partecipendu puru a mostras e fieras abi hiant pigau premius meda in Sardigna e in Continenti. In su 1961 propriu unu scantu de issas impari a su maistu de linna Sisinni Serra e arranguizzadas de su sindigu Efisiu Lippi Serra e de s’Amministrazioni de insaras, hiant organizzau sa famosa "Fiera de su Tappetu"  prosighida a pustis cun attenzioni manna de is atras amministrazionis finzas a oindì. Chi fait de Moguru unu logu de incontru e importu mannu pò s’artigianau. E po cussu chi oi cumenti a su passau maistas de su tessingiu cumenti a Pina Piras Spanu, sa cooperativa “Su Trobaxiu” centru pilota de s’enti Isola, Dina Maccioni e is sorris Fatteri e atras sighint a fai is arazzus cun is disignus e mostras nodidas de s’antigoriu.

Impari cun issas a donai importu a sa fiera de Moguru ci fiant e ci funti ancora is artigianus chi traballant sa linna: is famiglias Mandis, Serra, Casu, Maccioni, Orrù e Piras. Cun is iscannus e cadiras affundadas de spadua, casciapancas, piatteras e mesas in linna tostada de zinnibiri, castangia, fau, linnarbu e nuxi sgubbiadas e pintadas cumenti si fadiat un’orta in su passau fadendi mobilia e oggettus unicus apprezziaus in s’europa e in su mundu. Est custu artigianau chi hat fatu pigai nomona manna a sa idda de Moguru. Ma c’est puru su traballu e sa produzioni de su settori agroalimentari chi hat sempri tentu un’iportanzia manna a Moguru. Mulinu, caseifiziu e pastifiziu ci funt istaus giai de is primus de su Noixentus grazias a is ideas e a s’ingegnu de sa famiglia Marchinu. E ancora oindì a Moguru sighit a traballai su mulinu storicu de sa Famiglia Maccioni chi sighit a mobi su trigu sardu tostau de is terras de sa Marmilla e chi sa farra benit bendida in tottu sa Sardigna e finzas in continenti. Eccu poita funt presentis a Moguru tres panificius chi produsint su civraxiu, su coccoi e sa costedda, su pani saboriu de is logus nostus. Una produzioni cannotta abi si acciunginti is pasticcerias cun is drucis cumenti a su pani saba, pabassinus, ciambellas, biancheddus, sebadas, gattou e atrus drucis pruscatottu de mendula. No mancada mancu sa produzioni de nicchia cumenti a su casu de craba, de brebei e atrus prodottus naturalis, mentris in d’unu laboratoriu modernu si traballant secundu su passau is ous de mugheddu po fai una buttariga saborida chi benit bendida in tottu su mundu grazias puru a su cummerciu eletronicu.