Is mortus chi hiat tentu sa idda de Moguru me is duas gherras mondialis fiant istetius meda, 70 mortus e bintunu mutilaus asuba prus o mancu de 3 milla biventis in sa prima gherra e 16 fiant istetius is mortus in sa secunda. Apustis sa prima gherra po Moguru fut istau unu trasìu pistighingiosu meda poita po nesci de sa disoccupapazioni e s’emigrazioni sa genti arroscias de u biaxi de promissas mai abberadas, punnànta a si arrebbellai. Is amministrazionis comunalis po circai de appoderai is arrennegus e is arrebellamentus ddis fut beniu ammarolla a circai de torrai a poni manu a is progettus de su passau cumenti a su fabbricu de s’a mmazzatoiu e de su canpusantu nou.

E candu in tottu s’Italia is sodraus de chi fianta rientraus de sa guerra sempri prus arrennegaus si poniant sempri de prus cun is fascistas, su partidu chi a Moguru puru fut nascidu in su 1923 mancai s’annu a pustis po is elezionis politicas is fascistas nd’h iant tentu una perdita manna de parti de is sardistas chi hiant bintu cun 237 votus contras a feti 143. Est in su 1926 chi arribbat a Moguru Masuddas e Siris su podestadi Ferdinandu Dedoni sighiu a pustis in su 1929 de su torinesu Oresti Rosaspina, abarrau famau po nd’hai bittiu a Moguru sa luxi eletrica e s’arregorta de s’aliga, ma puru po s’avvabottu fattu contras de issu in occasioni de sa festa de Sant’Antiogu in su 1930. Fudi istada infatti sa mancanzia de s’autorizzazioni po sa prucessioni e is ballus pubblicus in onori de su Santu a criai un’arrennegu mannu de sa popolazioni finzas a arribbai a s’avvabottu contras a sa forza pubblica chi hiat finiu po sparai a sa genti boccendi unu giovunu mogoresu Giovanni Maccioni e ferendindi medas atrus.

In su periudu fascista però si fiant cumenzaus e finius is traballus po su casamentu scolasticu, sa diga in su frummini de Moguru e su ponti de sa Carlo Felici sen’e contai ca sa bidda hiat deppidu arregolli prus de milla sfollaus de Casteddu e giai tremilla tedescus de sa norantesima corazzada. E propriu in su tempus de is bombardamentus de Casteddu su liceu ginnasiu “ Dettori” fut istau trasferiu in su scolasticu nou abi ddui fut puru su cumandu de su Settimu Reggimentu de Artiglieria.

• Crescita de sa populazione