A pustis is gherras bintas contras a is sardus Punicus, is Romanus si fiant impossessaus de tottu is campidanus e de is logus abi fiant presentis is terras luazzas e bellas a traballai.

No totu is sardus de is logus nostus fiant istaus mortus o fattus presoneris e medas de issus si fianta fuius o ritiraus in is logus chi prus ddis permittiat de si difendi cun sa spera chi una dì o un’antra essant torrau a pigai possessu de is logus chi de sempri fiant istaus meris.

Roma, po ci arrennesci a controllai is territorius conquistaus in medas occasionis hiat mandau atrus presoneris de popolaus bintus in atrus logus cun sa promissa de ddus fai libertus, bastit chi essint traballau, appoderau e donau sicuresa a cussus logus in nomini de su guvernu de Roma.

In trà cussus 4 milla Ebreus arreffudaus in zittadi e imbiaus in Sardigna in su periudu impari a is sordaus Romanus e mercenarius congedaus de is gherras. A custus ddis fiant istadas donadas in arrenda is terras de is logus nostus, prezzendiddas in pruzzionis pitticas po ddas fai produsi su prus posibbili e donai brovendas e nodriziu a is popolaus de sa romanidadi.

Feti de ainci si spiegat su fattu chi me in su sattu de moguru siant istadas agatadas prus de binti biddixeddas e dominarius abi si scerant ancora is murus sciorroccaus, arrogalla de teba, tumbas, tobacciu, mobas po su trigu, miliarius e finzas unu ponti mannu chi serbiat po aggiudai su camminu de medas bias sardas pratigadas in s’antighidadi e miglioradas de s’ingegnu de is romanus.

Pruscatottu sa ia de importu mannu chi partiat de sa zittadi de Neapolis, segat in truncu su campidanu de Terraba Arcidanu e Uras e ingruxendisidda cun sa Calaris-Turris me is satus de Moguru e si imbiàda a costau de su frummini de Moguru (Rio Sacro) de Tolomeo, incamminendisidda in su Part”e Montis, finzas a arribbai a sa colonia romana de Usellus prosighendi a pustis a sa zittadi de Forum Traiani.