In sa seconda mettadi de su seculu VI a.C., a pustis is gherras cumbattidas bincendu e perdendo contra is sardus nuracesus chi si fiant accabbàdas in su 509 a.C., si fut biu in craru e tundu ca is punicus si fiant fatus meris e controllanta is maris e portus de tottu sa Sardigna.

Me is logus nostus puru, grazias a sa presenzia de su scalu portuali de sa zittadi de Neapolis, cun is bias de intradura chi assicuranta impari a sa pisca e is mineralis e is loris po su nodriziu, chi beniant imbarcaus in su portu de Neapolis e portaus a praximentu de is marineris in is terras punicas abi prus sindi intendiat s’abbisongiu.

Is regionis de su Part’ ‘e Montis e sa Marmilla puru, cun su canabi e sa bia naturali de intradura de su frummini de Moguru fiant direttamenti interessadas a custas culturas nobas abi, a parti su tempiu dedicau a su Deus “Sid- Sardu- Babbai” chi prof. Barrecca hat pensau chi si agatessit propriu in sa idda de Siddi, si funt agatadas atras testimonìas de cussu periudu storicu.

In su territoriu Mogoresu puru, abi a parti sa lastra de sa tumba agatada in S’Arxidda e chi immou est arreguada in su museu de Casteddu si funt agataus atrus sinnialis archeologicus de cussus tempus.

Pruscatottu me is satus de Cott’e Marroni e is Nuraccis abi, a parti is tumbas e arrogalla de tobacciu de varias genias, si funt agatadas finzas lastras de tumbas chi funt istadas isperdidas.