Su territoriu de Moguru est interessau de is temperias stasonalis: friscas e aquadias in s’attongiu e s’ierru e arridas e bascosas su in su beranu e s’iatadiabi.

Sa temperia de ammadimentu de s’annada est prus o mancu de 25 gradus e is proxinas funt prus o mancu de 700 mm.

In su logu si agatant medas arrius e coras chi mudant su tanti de is aquas a seconda sa stasoni, chi podit essi aquadina o sicca, abi is andarius e is carroppus de is arrius e is coras, in s’i stadiabi funt siccus e in s’attongiu cun su mudai de su tempus e is temporadas, si podit arribbai a frumminadas perigolosas e finzas is coras de Arriu sassu,Canabi furau, Canabi aintru Spadus, Riu murta, Serramuru e Scarrebi, podint scassai foras de is mraxis ponendi in perigulus e pistighingius mannus is popolaus nostus.

Chistioni diversa minescit su Frummineddu chi ndi calat de lad’e bente sobi de su Monti Arci arregollendindi tottu is aquas de su sattu de Pompu e Mragaxori, e chi a pustis atruessat is satus de Masuddas e si affottiat sempri de prusu in su sattu de idda, acciungendi aquas e donendi forza a su Frummini de Moguru.

Is mizzas funt pagus e no tottus o sempri currint in s’i stadiabi. E a parti Serra Muru, Scarrebi e Canabi Aintru tottu is atras chi no ddis accumpangiant is annadas punnant a si sciuttai o abarrai feti mizzadroxus.

In s’ieru e in beranu in certus satus de Moguru si formant medas paulis prenas de aqua cumenti suzzedit in su pranu de sa Jara, abi is pillonis de aqua, is anadis e atrus animalis arresis e zerpius agatant su logu giustu po annadai e si firmai in mesu de is erbas, sa spadua e is sessinargius.