Sparessius giai de meda is crebus, is crabiolus, is murvonis is acchibis is intruxus e su leppiri matta cani, abarrat ancora su mraxani, su coillu, su leppiri, s’ucchi mebi, s’arrizzoni, su mailloni, su caboru de siccu e pillonaxiu, sa pibara de aqua, is sazzaugas, cabixettas, pistillonis e me is anfibius s’arraixedda birdi e s’arrana pabeddosa.

Is pillonis funt abarraus ancora in medas: su stori, storittu, stori pedrixaiu, stori cobombiu, sa zuaddia, sa piga, su bicca matta, su curruccau, su crobu impari a sa carroga, e su carroghinu, sa pedrixi, sa giccuiri, su sturru nieddu, sa meurra biccu cera e medas atrus pilloneddus pitius.

Is varias arrazzas de animalis arresis e zerpius bivint a secundu is abbisongius manixendisi me is logus prus adattus: me is padentis podit capitai de bi ancora su birboni, su schirru matta, s’u cchi mebi arrubiu majori, chi bivit e fai su niu me is linnarbus, me is mudegus is zrivas, o logus aquadinus, in su trasìu de frius s’a gatat su caboniscu de mudegu, su beccaccinu, me is pranuras su leppiri de axroba, su crucuxoni de anazzu e me is logus lassaus a cru, su zurrulliu e finzas sa pudda media.

Me is coras e is fruminis est sempri presenti sa puddixedda su caboischeddu e finzas su caboni aqua. In su trasìu de is tramudamentus funt presentis is bobidus de caccabeddas, zaccarreddas e su concu idri chi pruscatottu in custus urtimus tempus fait su niu accanta de is frumminis,pabois e carroppus de su sattu de Moguru.

In s’istadiabi si ammirant sempri de prus is bobidus de curruccaus, sa pubusa e du conca mallu, chi ammostant tottu is colorius gallosus e ingespiaus insoru.

Su mudamentu de su sattu, is cinciaduras de is padentis e su disboscamentu de is narbonis, cun sa cassa fatta a fura sena de arrezellu, prepotenzia e mabiori, hant ispedriu in su seculu passau is urtimus crebus e crabiolus, lassendi in orfanìa su monti arci e ponendi in luttu tottu is logus e biddas a ingiriu de su monti.

Arregodaus infinis is piscis cumenti a sa grappa, sa trinca, bittida de atrus logus e s’anguidda e fillatrotta sempri presenti me is logus nostus, chi impari a is pagus ixibeddas e cambareddas cozzas e coccioba bamba, sempri prus arras, arregodant su piscau chi s’agatada in su tempus passau.me is coras e su frummini de Moguru.