• Popolau chi bividi a Moguru: 4636
• Mannaria de su sattu: 48,94 kmq
• Artaria: 35 m s.l.m

Moguru fait parti de sa provincia de Oristanis e su territoriu est laccanas a pari cun Gonnotramatza a est, cun Masuddas a nord, cun Uras a nor-ovest, cun S.Nicolò Arcidanu a ovest, cun Collinas a sud-est, cun Sardara a sud e a sud-ovest cun Pabillonis.

Moguru si agatat prus o mancu a 155 metrus asub 'e mari, s’ampraria de su territoriu est de 49,85 kilometrus quadraus, su logu est assrucàu de unu scantu coras e arrius e su prus mannu est su Frumini de Moguru.

Moguru tenit una popolazioni de 4 mila 636 abitantis, est una bidda de is prus mannas de sa provincia de Oristanis. S’agricoltura e s’allevamentu de su bestiamini funt is traballus prus pratigaus, sighidas de s’artigianau de su tessingiu, de sa mobilia e de sa produzioni agro alimentari chi, impari a su binu, agatant in sa famada fiera de su tappetu su logu prus annodizzau po ammostai e bendi custus prodottus.

E c’est unu bisu mannu chi de meda fait sa idda de Moguru. Sa Pro Loco, su Premio Letterario Marmilla e sa compagnia Teatro Tragodia, impari a atrus artistas si donant de fai ognia annu cun s’idea de sposai s’artigianau a sa bellesa de sa poesia, s’arti e sa cultura. Po criai unu logu de attobiu culturali appoderendi e spraxendi sa lingua e is iscienzias e connoscenzias de sa Sardigna in d’ognia logu.

Su nomini de Moguru
Asub’e su nomini de Moguru in s’andai de su tempus si funt fatas pensadasa meda, su Para Alfonziu Casu chistionendi de su contai de is anzianus, narat ca sa bidda est nascida po mesu de pastoris e crabaxus benius de is partis de su Gerrei e sa Brabaxia, e pruscatottu de Mogoredda chi tramudanta su bestiamini in circa de pasturas.

Issu narat puru ca su nomini ddi podit beni de mogheros = logu trumentosu o traballosu, o puru mahor = furriadroxu o masoni secundu su chi ndi penzada Spano. Esistit puru un’antra idea de issu chi narat ca ddi benit de su feniciu Makor = mitza e hiat a parri giusta poita a moguru ddui fut duas enas de acqua chi si agatant me in su cianu de s’rrocchibi e Funtanedda.

Corneliu Puxeddu narat ca su nomini ddi benit de is fueddus Bascus cumenti a Mokor-Mokil e Mokuru = coddu o coddixeddu basciu. Ferrer puru accostat su nomini Moguru a mok-r = logu artu e in Catalanu antigu Mugarò = titta accuccuràda.

Oi sa majorìa de is istudiosus nanta ca su significau prus giustu siat: logu paris in altura, cuccuru, coddu, coddixeddu basciu.