Moguru ollit nai puru usanzias e custumanzias de agricoltura e de bingiatteris. E su primu incontru de attobiu po si incamminai in sa passillada ddu teneus propriu in su biviu de su stradoni SS 131 a su km 62. Innoi si bit presenti e a spompiu sa turri bianca de sa cantina "Il Nuraghe" abi est consillau de si firmai po sa prima tappa e visitai is localis. Abi in d’unu apposentu funt postus in ammostu is binus prus nodius abi est de obbligu a ndi comporai assumancu callincuna bottiglia. A pustis hai fattu sonai is tassas po unu cumbidu, pigaus sa bia provinciali 44 e a pustis hai fattu is corruadas de Arroia Lacus in patr’e fillu si agataus a Moguru. Si est aberta sa fiera de su Tappetu e de s’Artigianau (fini de mes’e argiolas e mettasi de austu), sighendi is indicazionis de is cartellus beni presentis in is bias si arribbat a su logu de su centru polifunzionali abi postus in ammostu heus a agatai is prendas prus nodidas de is usanzias e custumanzia fattas de artisanus prus famaus mogoresus e de atras partis de sa Sardigna. Arazzus ingespiaus cun mustras de s’antigoriu, tappetus de lana fini e grussa, tendas e asciugamanus in linu, gioias fattas de pedra de pistoni in prata e oru, cascias pancas, canapeis, ottomanus, mesas iscannus de castangia e de zinnibiri, strexius de terra pintaus de ognia genia, quadrus chi arregodant is domus e is satus de is logus nostus e accanta is cumbessias cun is prodottus de is mandiaris saborius e prus famaus.

Abertas a tot’annu si podint visitai puru is buttegas de is artisanus chi traballant sa linna e de is tessingianas abi podeis bi de persona is traballus e cuntrattai fadendi comporas assumancu de una de custas prendas nodidas.

A pustis is comporas e is cuntrattus, arribbada s’ora de pappai cumennti est de custumanzia si podeus imbiai po fai visita a unu de is localis chi si agatant in bidda po tastai su pani mogoresu, is druccis de is logus nostus e pappai cun bonu appititu in callincuna locanda.

Visitendi sa idda de Moguru in s’iastadiabi podeus ascutai puru is ballus e cantus de is mellus artistas, gruppus folkloristicus cun is custumus insoru, recitas teatralis e culturalis pruscatottu cun is mellus poetas e scrittoris de sa Sardigna.

A pustis, impari cun is amigus o parentis est de obbligu a cenai in sa friscura de s’istaiabi in d’una locanda o pizzeria chi donendididda su beni beniu ti preparant is mandiaris prus saborius mancai de antipastus, primus e secundus gustosus de pisci e de pezza, scioberendi pruscatottu su procceddeddu arrostiu e ammurtau battiendiddu e cresimendiddu cun is binus prus callidadosus de sa idda de Moguru.