Su viaggiu po scoberi tottu is bellesas naturalis de is satus de Moguru incuminzat a lad’e basciu de bidda, a bent’e sobi. Lasendi is urtimas domus de via Eleonora, si incamminaus a lestru me in sa strada chi andat a Gonnotramatza e a pustis pagu trettu, agatendi s’ingruxeri de sa bia beccia de Moguru, si strissiat a manu esta in sa strada chi andat a canabi a su frummini de Moguru e sa diga.

Masciendi a manu manca a pustis 100 metrus si imbiaus in d’una strada ingiarrada chi passat in mesu de is coddixeddus de sarrecca a manu manca e a destra paba de crebu Custu nomini forzis ollit nai ”versante del cervo” cumprovau puru de callincunu corru agatau de pagu puru, chi testimongiat sa presenzia de su cerbu sardu chi biviada in custus logus.

Strissiendi a pustis unu bellu trettu de cammiu, prima a manu esta e appena fattus 100 metrus a manu manca, arribbaus a sa prima tappa de sa passillada poita si agataus in su frummini de Moguru, in su sattu o bau de Derda de Funtana [1]. In custu logu, annunziau de una filera de mattas mannas de arrobi, si presentat ananti sa meraviglia de is mattas, sa giarra bianca de su bau e is pedras cravvadas cun abbilidadi chi faint de ponti o passerella po atruessai satta satta a s’atru aus in mesu de s’incantu de is matas de linnarbu e ollastu de frummini chi coronat custu logu spantosu.

Torrendi a cou po pagu trettu fias a s’ingruxeri, si strissiat a manu manca in sa bia ingiarrada, antiga (Neapolis-Usellus) e a pustis unu scantu centus metrus si arribbat a s’atra tappa abi est presenti un’antru bau, su ”bau de canabi” [2]. In custu logu puru funt presentis is pedras de is pontis cun sa nassa ancora in funzioni po sa pisca de s’anguidda.Inni sa presenzia e s’ataccamentu de s’omini a su frummini si scerat ancora po is pagus isciuscìus e ruinas de unu mulinu becciu chi beniat usau po mobi su trigu po s’abbisongiu de genti meda. Prosighendi sa passillada, torraus a pigai sa bia maista e atruessendi su canabi a costau de su frummini e sperrendi in dus is paris de perdiana e sa struvina, a parti e atra si bint is ixibis e is mobas de moddizzi impari cun s’atru mattedu presentis in Conca Menga, Sa costa de linnas, Padenti e pabestius.

A pustis 2 km arribbaus a sa terza tappa abi est presenti sa diga de Santa Intoria [3] e castiendi de inni, addei de su frummini, si bint is cracchiris e is matas iscambilladas de linnarbu, pubuìa, ollastu de frummini e is camminamentus umbrosus a susu e a basciu de sa diga, intravverau de su sprigu de s’aqua de is carropus e is andarius de su frummini. Furriendi sa castiada a mesudì bideus is impabadas chi ndi scabiossant de perdiana e is coddus miocenicus de muntonaxi imprassau a craccu de is cruccuris afroriggiaus a crogorista prus longus e artus de su cantellu de s’omini.

Lassendi sa diga e prosighendi sa bia a pustis unu km si arribbat a sa stada provinciali chi portat a Moguru. Prosighendi derettus, attruessendi sa strada propriu asutta de su nuraxi de Cuccurada chi ticastiat in artu a manu destra, si imbiaus me is costeras e impabadas de Manghilla e sa Corona Manna in mesu de is crontas e is carongius de pedra niedda, is mobas de linna, is cracchiris e is padentis, chi ti faint intendi tottu is fragus arestis cundius e ammisturaus impari a is profumus de su tintioni, sa mamma de linna, s’arrosa budra, s’erba de coillus, su sparau e s’apicciga apicciga. A pustis fattu trettu costa costa, arribbaus a is giardinus de is satus de Scarrebi. Sattendi sa cora asutta de Monte ita e prosighendi in s’azziada de sa scaba, si agataus in su paris de sa struvina [4]  in mesu de is cadrillonis, sa ciorixina, sa scova de zacca pingiadas e is pabois. E cumenti a miraculu podeus agatai is orchideas, chi podeus regalai a su momentu giustu a is personas prus caras e istimadas.

Sa passillada acabbat innoi. Torrendi a Moguru podeus a praximentu andai in callincuna pizzeria o ristoranti o puru cumenti est de usanza, ogniunu ponit a disposizioni su chi dd’est abarrau de pappai e buffendisi un’antru ziccheddeddu de binu si salludaus mancai promittendusi de torrai a fai un’antra bella passillada me is satus ispantosus de Moguru.