Su sattu de Serra Neba chi fait parti de su territoriu de moguru, giai sinnialada po sa presenzia de unu scantu gruttas, si agatat in su pranixeddu pitiu abi fut postu su villaggiu prenuragicu de Puisteris abi si funt agatadas medas testimonias archeologicas.

Custu villaggiu fattu de barraccas s’agatat in d’una zona de terra e arrocchibaxiu biancu (arbu) de su periudu miocenicu accanta de su pranu de pedra niedda de Perdiana est connotu giai de is annus 50, grazias a is cumpudus e is arregortas fattas de Corneliu Puxeddu e a pustis de Enricu Atzeni chi hiant studiau e donau datazionis a is momentus prus antigus de sa presenzia de s’omini in su villaggiu chi funt pruscatottu de sa cultura Ozieri e Bonu Ighinu. Giovanni Lilliu puru hiat donau cumprova de custu logu massimamente chistionendi de su traballamentu de sa pedra de pistoni de su Monti Arci e a s’inghizzu de is annus 90 fut istadas pubblicadas fotografias de unu scantu oggettus, ainas e arrogus de tobacciu agataus de appartenenzia a is culturas de Bonu Ighinu, Ozieri e Santu Ciriacu de Terraba.

Cumenti arregodat Ermerenziana Usai in s’ocasioni de is traballus in sa bia beccia Carlo Felice in su trettu accanta de su villaggiu abi si fiant fatus atrus cumpudus e scorroncamentus de controllu e unu sgavu propriu accanta de sa grutta de Serra neba chi fiant serbius po agabbai de accrarài s’ampraria de custu villaggiu. Custu fattu est capitau tra maju e lamparas de su 2000 e cun sa direzioni scientifica de s‘archeolugu Riccardu Cincilloni e s’aggiudu de s’assistenti tecnicu Sannia si fiant fattus quattro sgavus abi funt istaus agataus tres istampus o funtaneddas pitias piccapedradas in s’arrocchibaxiu, in d’unu trettu a parti a un’ala de is atrus logus giai cumpudaus. Fiant forzis istaus fattus de sa genti chi hiat bividu in custus logus in su periudu Neoliticu de agabbu, cumenti faint a comprendi puru is ainas e is oggettus agataus a ingiriu e accanta pruscatottu de pedra de pistoni e atras ainas in pedras de azza.

Si podit penzai puru chi fessat orcibis po arregolli s’aqua, mancai po aqquai su bestiamini.Cun sa seconda prova de sgavu fattu a pillu, impari a meda materiali archeologicu est cumparta puru una cora naturali asuba de is arroccas prenas de medas ispistorus, schedras e ainas archeologicas de azza. Si podit penzai chi fessat materiali lissiau e scabiossau de is logus prus in artu e ammuntonaus a pustis is araduras e is aquas proixinas o puru usau cumenti a muntonarxi.

A sa luxi de tottu custu si podit penzai chi a ingiriu a lad’e foras de su villaggiu de Puisteris ddui pozzat essi istau unu logu abi accorranta su bestiammini e forzis po atras comoidadis. Su materiali agatau est de sa civillidadi de Ozieri e cunfrimmat ca su logu fut istau pratigau finzas a is tempus de agou de su Neolitigu.