Murus de una baracca beccia e domus e satus de Moguru, abi si agatant ancora ruinas, sciuscius e testimonìas archeologicas a cumenzai de sa preistoria. In su sattu de Puisteris, sccanta de su paris de Perdiana e accanta de su frumini de Moguru, si agatat unu vullaggiu prenuragicu de importu mannu. In custu logu a cumenzai de is annus 50 is cumpudus aecheologicus hant postu in luxi unu de is villaggius neolitigus prus mannus de Sardigna, cun is arrastus de prus de 260 barraccas de formas e genias diversas chi faint a cumprendi ca su villaggiu in periudu neolitigu fut pruscatottu logu abi si traballat sa pedra de pistoni, sa pedra neidda e s'arrocchibaxiu tostau de su Monti Arci e de is coddus e cuccurus de sa Marmilla.

Sa presenza de s'omini me is trasinus e periudus nuraxinus est testimongiàda grazias a is medas monumentus e tra custus su prus connottu est su nuraxi de Cuccurada, chi est postu in s'azza de una costera a facci a soli de su pranu de sa struvina e chi de pagus annus is archeologus funt scorronchendiddu po ddu torrai a poni in luxi. De importanza manna, impari cun is atrus, funt puru is nuracis de Arratzu, Arrubiu, Nieddu, Scarrelis, Pranu Ollastu, Sa corona Manna e medas atrus e su Putzu o funtana coperta de Pauli Azzuvau.

Cuncordias, oggettus e ainas de su periudu de sa zivillidadi de Ozieri e Monteclaru e Santu Tiriagus si agatant in logus meda e funt presentis in cantidadi manna is ruinas e sciuscius de medas biddixeddas, furriadroxius e masonis de su periudu punicu romanu. In tra custus primu logus si podint arremonai Is Nuracis, S'Argidda e Cort'e Marroni; tra is romanus cussus ingiriu a is nuracis de Scarrelis, Nieddu, Arrubiu, Santu Pedru, Santa Barbara Manghilla e me is logus de Bonorcili, Craccaxia, Cort'e Marroni, Serra muru, Triori, Pala de Litteras, Pisceri, Perda Funtana, Piscina Monti, Santu Nigou. Unu ponti romanu si agatat propriu in su sattu de Su Ponti Becciu. Me is satus de Moguru si agatant puru is ruinas e is arrastus de biddas de su tempus Bizantinu e su Medioevu sparessias me is seculus XV e XVI.

In su sattu de Craccaxia si agatat sa Cresiedda de Santa Maria de Carcaxia, torrada in parti a fabbricai in su 1922 e chi finzasa s'edadi moderna fut istada parrocchiali de una bidda abbandonada.