Su nuraxi de Cuccurada est postu in dun’azza de pedra niedda asuba su pranu de sa "Struvina" chi si incarat a su Campidanu spondendinci sa mirada a atrus logus attesu. S’area archeologica ti fait bi unu nuraxi mannu e interessanti, cun medas fabbriccaus a ingiriu de sa turri antiga fatta a “curridoiu” abi a costau si apoggiat su bastioni cun quattro turris acciuntas a pari de murallas drittas chi imprassant una prazza manna abi si agatant is intradas de giai tottu is localis de aintru de su monumentu. Funt presentis in prus, unu fabbricau mannu de forma tundazza, una muralla manna a facci a sobi cun pedras gianghillonas a ingiriu de su nuraxi, e medas basamentus sciorroccaus de barraccas eneoliticas chi si agatant in s’azza de su mraxi, arregodus de unu villaggiu mannu ancora senza de scorroncai. Is inghizzus de su fabbricau de custu casamentu nuraxinu parrit chi si pozzat ammadì a is primus tempus de sa cultura Monte Claro.

A pustis unu periudu de crisi fut torrada a arrangiai e ammanniai in su tempus de su Brunzu de agou (1330-1150 a.C.), periudu chi su santuariu monumentali hiat connottu su sviluppu prus mannu. A sa fini de su brunzu de agou nci fut istau unu torru mannu de popolau e in parti hiat tentu finzas isciuscius. A pustis atru tempus hiat tentu un’antru sviluppu cun d’unu aumentu de popolau in su brunzu de agabbu de sa prima edadi de su Ferru (1150-750 a.C.) innantis di essi stau po sempri abbandonau. Trà is materialis agataus cun su cumpudu e su scorroncamentu est de importu mannu su brunzettu chi impersonat una scena de cassa.

De teni presenti e anodizzai est puru sa scoperta fatta in su curridoiu pitiu accanta de s’intràda a sa prazza manna, abi si est agatau unu muntoni de materiali votivu de s’urtimu periudu romanu chi ammostat testimonìas de interessu mannu po su logu abi fut postu e po sa genia de su materiali agatau. In sa stibba de su nicciu o muntonaxeddu si funt agatadas medas carroccias e barras de brebeis, crabas e finzas de bois, e impari a custus muntonis de ossus si funt agataus puru spillas de ossu, candebas de strexiu de terra interas e spistoradas, monetas in brunzu e arrogus de imbirdi de diversa genia. Tottu repertus de appartenenza prus o mancu a su seculu 1V apustis Cristu. Is cosas agatadas hiant a parrit de appartenenzia a is cultus de religionis ammisturadas cun traggius e modellus paganus, giudaicus e cristianus chi faint a cumprendi ca su nuraxi teniat diversas funzionis e fut istau logu de incontru e attobiu de atrus popolaus a pustis s’agabbu de s’importanti civillidadi nuraxina.