Sa lingua chi si chistionat a Moguru est sa fueddada Marmillesa-Partemontesa. Est una filla nodida de sa lingua sarda chi mancai ammostit unu biaxi de genias diversas de pronunzias.

Assimbillat a atras chi si chistionant in atrus logus de su Campidanu.

In su campu de is istudius, custa genia de fueddàda est connota meda grazias a su dizionariu de s’ottuxentus imprentau de su Cabonigu Bissenti Porru e chi su Maistu de is linguas sardas Max Leopold Wagner nd’hiat fattu un’aprezziu mannu chistionendindi cumenti a unu de is vacabolarius prus importantis chi mai siant istaus imprentaus asuba una lingua romanza. Eppuru , cumenti scridi su linguista Giuliu Paulis , mancai s’opera de Porru e is atras ricercas e studius fatus a pustis de parti de atrus linguistas e tra issus su giai arremmonau Wagner e in is urtimus tempus cun is acciungimentus fatus de su poeta Faustinu Onnis, non tottu cussu chi siat a depi isci’asuba custu modu de fueddai est ancora istau beni studiau, cumenti dimostrat su fattu ca oi in dì puru, liggendi is cumponimentus de is poetas e scrittoris campidanesus , est possibili chi si agatint espressionis idiomaticas e fueddus non riportaus me is vocabolarius finzas a immò imprentaus. Custu fattu risultanta prus beridadosus candu is Poeta o Scrittoris chi scrint rispettat sa chistionada naturali de s’antigoriu e no punnat a fai cumenti a certus , chi po circai de strocci sa modernidadi,ammasturant tottu cun su risultau de struppiai tottu e no fai cumprendi su sensu de su chi hiant a bolli nai.

Sa lingua chi si chistionat a Moguru quindi, minescit prus cracullamentus de parti de chini in su benienti hat a bolli persighì su traballu nodiu e meritoriu asuba is istudius de sa chistionada decida e importanti de sa fueddàda Mogoresa e de atrus logus de accanta.

Is Mogoresus si annodizzanta de is atras biddas de su campidanu e pruscatottu de casteddu , po unu scantu genias diversas de fueddai cumenti a su sonu abertu de sa A e de sa E e po sa pronunzia puru de sa L cumenti a doppia. Diversas de atrus logus funt puru:

• Is sonus carighinus de sa N intre dus vocalis chi arruit donendi sonus carighinus a sa vocali de ananti: es, bei(beni)=vieni, campaas, (campanas)=campane, funta’(funtana)=fontana
• Sa L intre is vocalis si liggit B: abribi (abrili)=aprile; Cabandi(Calandi)=scendi; cibixia(cilixia)=brina
• Sparessit de s’infinìu sa R cumenti a: bessi’(bessiri)=Uscire; bocci’(bocciri)=uccidere; scri’(scriri) =scrivere
  
• Sparessit sa R me is casu RT, RC,RTZ: ascuta(ascurta)=ascolta; cicai(circai)=cercare; intzetai(intzertai)=azzeccare
• Sparessit sa L tra dus vocalis: betua(bertula)=bisaccia; ceu (celu)=cielo
• Sparessit sa R tra dus vocalis: prexei(prexeri)=piacere