Curriat s’annu 1604 e fiaus in sa cida santa (sa data giusta no si connoscit assaretta). Forzis fut su 12 de abribi e custa est una di de importu mannu po sa genti mogoresa e no feti. Poita in cussa di fut capitau su fattu de su Miraculu Eucaristicu. Fut suzzedidu difatti in s’occasioni de sa cida de Pasca a su momentu de sa missa candu su Praidi Srabadori Spiga fut donendi sa Cummunioni. Sa genti contat ca nanca si fianta accostaus dus ominis indignius chi no si fianta cunfessaus prima de comunicai. Is ostia cunsagradas cumenti chi si fessat offias arreffudai de entrai in bucca de custus sacrilegus ndi fiant arrutas asuba de unu gradinu de sa barandiglia. Custus ominis intimoriggiaus e pistighingiaus in patre fillu fiant sparessius de cresia, is ostias fiant istadas arregortas e sa pedra fut istada sciacuada cun rispettu cumenti narat sa lei de sa cresia candu suzzedint custus fattus. Ma mancai essint affatteriau e fattu e finzas arraschiau sa pedra, s’arrastu e su marcu de is ostias no feti no fut isparessiu ma si fiant sceraus sempri de prus.

Custu est su contai de is istoricus e tra cussus su Predicatori famau Pedru Cossu su Para Casu e Corneliu Puxeddu de Moguru chi chistionant de is accertamentus fattus de su Piscamu de cussus tempus Mons. Antoi Surreddu e de is Piscamus benius a pustis. In sa Curia de Abas però custus iscrittus no si agatant prus . Teneus però atrus documentus e testimonìas chi cumprovant custus fattus cumenti a sa pedra chi si agatat ancora inserrada in su stuggiu abi si scerant is arrastus de is ostias e sa venerazioni chi is mogoresus faint de quattro seculus fait po arregodai custus fattus. Ndi fait fidi puru un’antru autu imprentau de su notariu Pedru Antoi Scanu de su 25 de maju 1686 abi su Rettori de Moguru fait su cuntrattu po unu stuggiu de linna indorau chi depiat essi postu asuba de s’altari majori po inserrai sa pedra de su miraculu e po essi postu in ammostu po is fidelis e una pintura de un’artista famau immou arreguàda in sa pinacoteca de Casteddu chi ponit in mostra propriu sa figura de su miraculu.

Oi, a pustis is traballus de arrangiamentu de sa cresia accabbaus in su 2005, sa pedra de su miraculu est istada torrada a inserrai in d’unu stuggiu indorau e colloccada in sa mesa de s’altari nou cunsagrau de pagu in d’unu momentu de sa cerimonia, abi est istau postu a spompiu mannu po arregodai custus fattus e rendi onoris a su deus soberanu.