S’arazzu, cun is mostras suas ingespiadas de milla coloris e tramassadas de filus indoraus est sa mellus prenda de is tessingianas mogoresas tramandau de mamma in filla in s’andai de su tempus.

Si cumenzàda a imparai de sendi piccioccheddas tessendi a is inghizzus is sacconis po su trigu, baintas e matallafus in linu, teba po is cammisas e crazzonis de arroda, lenzolus, tiallas e tialloras e a pustis cun s’imparu, su lauru de portai in coianzia impari a is telus de orbacci po is bistimentas, bettuas e cannaccas po is cuncodrias de is bois e is quaddus.

E grazias propriu a custas siendas de connoscenzias lassadas in arenzia chi si funt pozzias aguantai custas usanzias nodidas chi si ammostant in tottu su luxentori pruscatottu cun is arazzus.

S’arazzu nascit a is ighizzus cumenti a cobiribangu po mesas o is cascias, e benit usau po donai coloriu e traggiu a sa domu e cuncodrai sa mobilia pobera de is sardus. Tant’est beru ca custus traballus beniant firmaus cun su nomini de is tessingianas chi dd’hiant fattu, chi dd’hiant arricciu in donu o de chini fut istau cummissionau, sinnendi puru s’annu chi fut istau finiu e agabbau.

S’arazzu fut longu e strintu (prus o mancu mesu metru de ampraria), callincuna cosa immancu de is mesas e is cascias de cussus tempus e feti a is inghizzus de su seculu passau dd’hiant cumenzau a apiccai a is murus de is apposentus cumenti a quadrus de importu e valori mannu. A pustis ddus hiant cumenzaus a ammanniai po arribbai finzas a 80 cm de ampraria e unu metru e ottanta de longaria.

S’arazzu mogoresu est un’ingespiaduras de coloris traggiosus e galanus chi ammostant pruscatottu s’arrubiu, s’ asullu, birdi, grogu, nieddu imprezziau a bortas de filus de pratta e indoraus, carrigu de figuras e mustras cumenti a s’unicorru, is cerbus allobaus, sa idi, sa columba, is baddadoris a ballu tundu e simbulus arcanus cumenti a sa dama intrendi in cresia cun is candellobburus in manu chi sinci portat a sa notti de is tempus fadendisi arregodai sa femia “Mater Sarda”dea e Madonna nodìda mudada in su tempus.

Disignus mogoresus funt puru is mustras de is arrossa, is gravellus, dalias e tulipanus, abi in d’unu arazzu de su 1882 intregau a sa cresia e atrus arreguaus in medas famiglias chi arregodant tottu sa futtesa e ingegniu de custas maistas tessingianas.

Ma si tottu custu lauru tenit arrexinis antigas, in custus urtimus tempus, a cumenzai de is annus 50, is tessingianas nostas, mudant disignius e tragius chi mancai arregodint is cillonis e mantas de s’antigoriu donant s’inghizzu a su tessingiu de su tappetu adoperendi lana prus grussa e coloris a tintas prus dilicadas cumenti a grogus cottus e crarus, s’arrubiu e su nieddu chi funt is prus apprezziaus, abarrendi fidelias a is disigniu e simbulus de s’antigoriu.