Salta la barra di navigazione e vai ai contenuti
Impari a is arazzus e tappetus si faint puru atrus traballus, cumenti a coberibangus, betuas, cannaccas o gutturadas po is bois e is quaddus po ddus podi cuncodrai e bogai in prucessioni e chi in custus urtimus annus benint appiccadas me is murus pruscatottu de is apposentus po donai colori e mudai su logu, is cillonis e fanigas po coberri lettus pitius e mannus matrimonialis, is tendas, tiallas e tialloras e pannus de facci (asciuga mani) pruscatottu in linu.
Is traballus fattus in linna benint de s’antigoriu mannu passau de maistu a scienti (cascias cun disignus a rosonis, pavonis leppiris de axroba,pubusas cerbus e sirbonis) fatus tottus a manu cun sa sgubbia e su scrafeddu, credenzas e armadius, piatteras, parastaggius, mesas mannas e pitias, canapeis ottomanus e scannus, affundaus a manu cun sa spadua de is frumminis e coras de accanta, chi funt ispantus e chi ognia maistu de linna o scannaiu firmat marchendi a fogu su nommini suu, cumenti si fait cun tottu is oberas de is artis nodidas.
Medas funt is arrazzas de is linnas usadas e, intrà custas, in custus urtimus tempus pruscatottu sa castangia e su zinnibiri becciu de seculus, agatau me is domus isciusciadas chi serbianta po arrei sa crobettura cumenti a traias, traicciobas e po sa pinna acuzza. In sa fiera si podint bi’ puru atrus traballus artisticus de importu mannu cumenti a su strexiu de terra de ognia genia, strexus de fenu, quadrus e atras oberas cumenti a is prendas de sa perda de pistoni (ossidiana), chi donant nobilesa spantosa a custa rassigna.
