Pagina de inghizzu > Connoscenzia > Sa fiera de su tappetu >

Funt prus o mancu 80 is siendas chi ponint in ammostu is oggettus artisticus in sa fiera e benint de tottu sa Sardigna.
Su scioberu e selezioni chi fait sa commissioni cun su scopu de appoderai custas artis e is callidadis est seria e finzas rigorosa. Est custa sa prima siguranzia chi benit donada a sa genti: traballus fattus a manu e abbilidadi e imbentu in su rispettu de is artis nodidas de s’antogoriu.
Nascint de ainci is traballus chi hant donau nomona manna a Moguru po indi fueddai cumenti a sa bidda prus nodida de s’artigianau in Sardigna.

Oi puru, cumenti a su passau, funt presentis is maistas tessingianas chi in su 1961 hiant cumenzau custa fiera: Pina Piras Spanu, Dina Maccioni, is sorris Fatteri, sa cooperativa “Su Trobasciu” (centru pilota puru de s’enti Isola) e atras chi sighint a fai arazzus e tappetus cun is mostas colorias e ingespiadas de is logus nostus.
E impari cun issas funt ancora presentis is maistus artisanus chi traballant sa linna: sa famiglia de is Mandis, Serra, Casu, Maccioni, Orrù e Piras, impari a tottu is atrus artisanus chi approbiant de totus is partis de sa Sardigna e chi traballant su ferru, su strexu de terra, sprigus e lampadarius, strexu de fenu, goteddus e arresoias e finzas gioias e prendas de oru de prata e de coraddu.
A su cuminzu de s’annu 2000 sa fiera arriccit puru is mandiaris cumenti a sa cancioffedda, sa cogozzua, gureu, pibaroni, pani, druccis e casu produsiu de is biddas de sa Corona Arrubia abi Moguru ndi fait parti.

Po su prexiu de is tastadoris, funt presentis e a spompiu mannu is binus prus callidadosus de sa cantina “Il Nuraghe” e sa buttariga fatta de ous de mugheddu traballada e stasonada a Moguru de sa “Blue Marlin”, e in custus urtimus tempus si funt acciuntus is artistas chi traballant cun futtesa manna sa perda de pistoni fadendi gioias ispantosas, e pintoris chi disignant quadrus de alabanzia fatus cun diversus materialis, is figurantis de is domus e portalis antigus de su Part’e Montis e de sa Marmidda abi si bint is prazzas cun is carrus carrettas, zirus, scateddas e apalladroxas e tottu is ainas chi serbiant po is traballus de su passau ammostendi puru is logus de is satus, coddus, cruccus e campuras de is logus nostus.
E cumenti chi no bastessit, a su momentu de sa fiera, is artisanus de Moguru aberrint in perra in perra is portalis e gennas insoru de is buttegas, e sa Pro Loco chi trumentat po poni in ammostu is bisionis de su passau de sa idda, e is mustras de is librus sardus cun is mellus iscrittoris e poetas isolanus.