Sa cresia de su Cramu fut istada fabbricada a s’inghizzu de su seculu XIV cun traggiu romanicu goticu, e hiat fattu parti a pustis de su guventu de is paras Carmelitanus arribbaus a Moguru is su 1600 e partius in su 1855 a pustis sa sa bogàda de is paras de is monasterius e is esproppriamentus de is benis de sa cresia a su stadu. Fatta in bloccus de pedra bianca, portat feti una nai maista cun sa pinnacuzza a tottu longu chi arreit sa crobettura aggiudàda, de is traias e traicciobas de linna. Su portali de ananti est romanicu cun asuba un’antru arcu de scarrigu. A is costaus de su portabi atras corondueddas e capitellus goticus si aberint a atrus archixeddus chi dividint sa fascia de asutta de s’affacciàda a lad’e ananti. Is proprius archixeddus cuncodriant is parti de asuba puru, Is murus a lad’e foras a su costau funt imbellius de corondueddas fintas, archixeddus goticus e figureddas in pedra. In su muru de manu esta est postu su campanili a vela. A ingiriu de sa cresia ddui est una bella prazza e su giardinu chi si cumbidat a castiai e ti frimai assumancu una scuta po ti gosai custu logu praxibi.

Sa cresia parrocchiali intregàda a Santu Brannadiu de Siena s’agatat in mesu de sa bidda. Sa bovida de sa nai est feti una, cun ottu capellas a costau. E tra custas, a s’intrada e a manu manca de sa cresia si annodizzas sa Madonna de s’Arrosariu de su 600 posta asuba de un’altari indorau de su propriu trasìu, chi ammostat duas corondueddas fattas a cabacorru.cun sa statuedda minninnìa de Santu Domigheddu impari cun su cani. Su traggiu de sa cresia est tradu-romanicu-baroccu, sa longarina est de 25 metrus e prus e sa largaria de 15.In sa cresia no ddui funt oberas de arti de valori mannu si no una gruxi de prata po in prucessionis chi secundu su contai de sa genti parrit chi benessat de sa bidda de Bonorcili agatada cuada de Zia Giuanna Zonca e bittida a Moguru a pustis s’assaccheu de turcus e morus chi hiant distruiu sa bidda. Atrus dodumentus invecias narant ca fut istada fatta fai in su 1603 de parti de s’Arretori Spiga. Sa bovida de sa nai maista est istada pintada in su 1933 de su pintori Bacciccia Scano, cun is disignus chi arregodant sa fida de Santu Brannadiu. A pabas de s’altari majori ddui est unu nicciu abi est colloccadada sa statua de Santu Brannadiu, chi de pagu tempus est istada torràda a portai a is coloris sus de s’antigoriu cun su bistimentu damascau. Sa statua benit posta in su nicciu po ses mesis a cumenzai sa festa de oggniasantu(s’inserru) e po atrus 6 mesis benit (Cabala) e posta in ammostu po is fidelis in mesu de is capellas a manu esta de sa cresia. No si connoscit s’inghizzu de custa usanzia e custumanzia. Finzas a pagu tempus, a manu manca de s’altari majori, aintru de una cascitta de pratta, ddui fiant inserradas is reliquas de su miraculu eucaristicu suzzedidu a Moguru in su 1604. De pagu est istada torràda a fai est e postu in ammostu po sa genti in d’unu stuggiu de prata indorau. A pustis is urtimus arrangiamentus de sa cresia, impari a is tinturas e pinturas agabbadas in su 2005, sa cresia cumparrit spantosa e prena de luxentori, no feti po is disignus nodius torraus bius cumenti a su passau, ma po is murus e coronduas libertadas de is acciuntas malamenti fattas, a is urtimus de su seculu passau.

Sa cresiedda de sa Madonna de Craccaxia s’agatat in d’una bidda medioevali distruida de s’antiga Curadorìa de Bonorcili. Sa cresia est dedicàda a sa Virgini Assunta in Celu e si penzat chi siat de s’annu 1000.Est istada arrangiàda unu scant’ortas e finzas isciusciada, tant’e berus ca in su 1750 meda materiali fut istau usau po arrangiai su ponti becciu chi si agatat in su frummini de Moguru.Fetti in su 1921 fut istada torràda a fai grazias a una oddetta e su traballu gratuiu de medas mogoresus.Sa cresia est feti a una bovida cun d’unu campanibeddu a vela e un’absidi pitiu mesu tundu e is pedras de fabbricu funt biancas e in parti nieddas e oindì cumaprrit ingiriada de unu giardinu cun matas , bingias livarius e mendulas.

Sa cresiedda de Sant’Antiogu, unu tempus patronu de moguru est posta in d’unu coddixeddu e siddui podit entrai grazias a unu scaberi de pedra niedda chi si incarada a sa prazza manna de ananti. Est a bovida unica, cun d’unu campanibeddu a vela a duas fentaneddas,a lad’e ananti est tottu fatta in pedra niedda, e tottu s’atru est in pedra bianca. Sa data de su fabbricu no si scidi mancai si penzit chi siat beccia meda. A su tempus de s’Arrettori Sanna de Santu Aingiu (mogoresu in nascita) fut istada ammanniada e pruscatottu a lad’e ananti fabbriccada cun pedra bittida de sa cresia scunsacràda e abbandonàda de Santu Pedru chi si agatat accanta de su stradoni ss 131, tant’e berus ca est abarrau s’arregodu de is anzianus ca de custa cresiedda impari a atrus fabbricaus distruius de sa biddixedda chi ddui fut a ingiriu is Mogoresus nanca nd’hiant bittiu 300 carrus de pedra chi fut istada usada no feti po su fabbricu de sa cresia ma po atras operas puru. A ingiriu ddui fut su campussantu becciu abarrau in funzioni finzas a su 1933 e sciusciau in su 1959 po fai unu fabbricu mai agabbau po un’orfanatrofiu vescovili. De interessu mannu funt is quadrus de is promitenzias po is grazias accanzadas a is fidelis de su santu e pruscatottu de Santu Brannadiu chi po sa festa sua benit portau a custa cresiedda a spompiu mannu de tottu su popolau.